TURA: Assam aro Meghalaya a·dokni simarango ru·uta bilsirangna meligrikgijanirangko namatna gita a·dok damgnini sorkarirang kam ka·engon, West Garo Hills a·jani Pedaldoba jolrango donggipa songrangoba Assam sorkari napdrae, nokrangko rikenga ine Garoland State Movement Committee (GSMC) Pedaldoba regional unit parakatenba, ia jolrango iandake Assam sorkari napdraaniko champengchina a·dokni Chief Minister Conrad Sangma-ko didiataha.
GSMC Pedaldoba regional unit-ni chairman Rimjen Ch Sangma-ni parakatani gitade, Pedaldoba jolrango donggipa dingtang dingtang songrang jekai, Kuring, Pedaldoba, Fakirmara, Borjhora, Takurbila, Sualmari aro uandakgipa songrango Assam sorkari aro Assam a·dokni manderang napdrabae songdong a·chatokenga aro ia biaprangona napdrabae songdong a·chaenggipa manderangna Assam sorkarini gita a·ani lekkarangko tarie on·engachim.
“Ia biaprango songdongenggipa manderangna Assam sorkarichipakni lekkarangko tarie on·enga indiba GHADC-ni gitade ia jolrangna 2005 bilsionin a·a patta on·aniko dontongatahani gimin Meghalaya a·dokni manderangde a·a pattarangko tarina man·jaengaha. Jinjiram chibimaan Assam aro Meghalaya a·dokni sima ong·achim indiba Assam-ni manderang, Jinjiram chibima batpile napdraenba nokrangko rikengaha,” ine GSMC Pedaldoba regional unit-ni chairman parakatenba, iani bidingo ta·raken Assam sorkari baksa agangrike, ia jolrango songdongenggipa manderangni neng·nikanirangko namatchina Meghalaya Chief Minister-ko didiataha.
B-Mahal-ni ning·o donggipa hectare 5000 a·arangko GHADC-ni Meghalaya Tourism Development Corporation (MTDC) aro Meghalaya Industrial Development Corporation (MIDC)-na on·enggipani bidingo janapatskaengon, ia biaprango mai dakgipa namroro silroroaniko ra·bana miksonge ia a·arangko MTDC aro MIDC-na on·engachim, iarangni bidingo jolni manderangna agan-talate on·chengchina GSMC Pedaldoba regional unit-ni chairman didiataha.
“Ia biaprango namroro silroroaniko ra·bana MTDC aro MIDC-na palaniko chinga jegalenga ong·ja indiba ia biaprango mai kamrangko a·bachengatna sienga aro ia jolrango songdongenggipa manderangna mai namgnirangko on·na miksongenga, da·onan ia jolrango songdongenggipa manderangna GHADC-ni MDC-rang, agan-talate on·na dongkujaenga,” ine Sangma, chief minister-na seatgipa chittio janapataha.
Indake ong·engon, B-Mahal ning·o donggipa nokdangrangna bigha gni ka·e a·arangko on·enba, bangki dongkuenggipa a·arangkode ra·pilna gita GHADC-ni gitcham CEM Benedic Marak-ni tik ka·aniko da·o gital Executive Committee-ni ra·galatpilahani giminba GSMC, MDA sorkariko aro NPP-chi dilenggipa GHADC-ni EC-ko mittelpilataha.
Pedaldoba jolrango donggipa songrango Assam sorkari napdraenga: GSMC
Date:
Share post:
