Shillong: Mijal salni bako, North Eastern Hill University-ni, NSS unit, 53-gipa, Foundation Day-ko, Multi Convention Hall, NEHU, Shillong maniangaha ine koboro parakataha.
Indake manianiona, Rajya Sabha-ni MP, Dr W R Kharlukhi, Chief Guest ong·e sokbaaha.
Programme-o dongpae bakko ra·enggipa manderangna, Dr Kharlukhi, ”anga NSS-ni programme-ona re·bana gita man·e namen kusi ong·a mainga college-o re·miting somoirangode angaba, NSS-o bak ong·pagipa mande ong·achima,” ine aganangaha. Unbaksana, NSS-ni gita dingtang dingtang songsalna programme-rangko ong·ate manderangni janggi tanganio dingtanganirangko ra·baaninaba de·mittele aganangaha.
A·doko poraianirang matchote kam man·gija dongenggipa chadamberangni giminba ua aganengmitingo janapangjolaha. Indake, ua poraienggipa chatro chatrirangko bimchipe kamrangko ka·e janggi tangani ramarangko sandie, kamrango am·gipa ong·gija gipinrangna kamrangko on·skagipa ong·chinaba didie agananiko dakangaha.
Unbaksa, a·dokni dingtang dingtang bakrangoni re·bae programme-o bakko ra·enggipa, NSS dolrangkoba ua de·mittele aganangaha aro mikkangchi kam ka·anirangko chu·sokanirangko man·china nama skaanikoba on·angaha.
Programme-ko ong·atanio, University level-ni gita NSS Award-rangkoba, dingtang dingtang college-ni, NSS programme officer-rang aro volunteer-rangna, 2022-23 bilsio songsalna namgipa kamrangko ka·anina on·angaha.
Award man·gipa manderangko kamao mesokatenga.
Nambatgipa, NSS Volunteer-rang; Ms Naphisaroi Kharbuli, NSS Unit, NEHU, Shillong, Ms Kerdarilin Khongwir, Lady Keane College, Shillong, Mr Armstrong Lyngdoh, Ri-Bhoi College, Nongpoh, Mr Suklang Paul Kurbah, NSS Unit, NEHU, Shillong aro Mr Pyndemlang Lyting, Shillong College, Shillong-ni ong·a.
Nambatgipa, NSS Programme Officer-rang; Mrs Iasuklang Kharumnuid, St Mary’s College, Shillong aro Mrs Yomica V Syiemlieh, Ri-Bhoi College, Nongpoh ong·a.
Namgipa, NSS Unit-ko, Ri-Bhoi College, Nongpoh man·aha.
Programme-ona re·bagipa sakgipin manderangara, Dr M M Khymdeit, Programme Coordinator, NSS, NEHU, Shri F Rumnong, State NSS Officer, Meghalaya aro Prof P S Shukla, Vice-Chancellor, NEHU, Shillong ong·a.
