Dajongpara Bakrao Juri Maharini a·kingoniko niam gri ro·ong bikotengani gimin mikrakata

TURA: North Garo Hills a·jani Dajongpara Bakra songo donggipa Juri Maharini a·kingoniko niam gri ro·ong bikotenba pale cha·enga ine Maharini chrarang parakatenba, ia a·kingoniko niam gri ro·ong bikotenggipa manderangko dontongchina mikrakataniko on·angaha.
Dajongpara Bakra songo donggipa Juri A·kingni chra saksa Silingbarth Juri Sangma-ni parakatani gitade, batanggimin somoirangonin ia a·king a·brioniko niam gri ro·ong bikotengani gimin Juri a·kingni manderang a·jani Deputy Commissioner-na u·iataha aro uandaken Deputy Commissioner-ba iani bidingo forest officer-na nanga gita ja·kurangko de·china u·iatskaahachim.
Indake ong·genchimoba, ia a·kingoniko niam gri ro·ong bikotaniko dontongkujaengani gimin Sonibar salo, Juri Mahari aro Maharini chrarang tom·e chanchirimangenba, niam gri ro·ong bikotaniko champengna dingtangmancha guare kapenge donbaaha aro ro·ong bikote pale cha·enggiparangko mikrakatna gita ba·ra gitchakko songe donbaaha ine Juri Maharini chra parakataha.
“Juri a·kingni a·brirangoniko niam gri ro·ong bikote pale cha·engani gimin pilak nangchongmotgipa lekkarangko on·e GHADC-ni chief forest officer-na badi ka·angahaoba ia biaponiko niam gri ro·ong bikotenggipa manderang ra·bipangpilani gita kamrangko dontongkujaengani gimin mikkangchiba ia biaprangoniko ro·ong bikote pale cha·angkugenchimode chinga rakgipa ja·kurangko de·na draatako man·gen,” ine Dajongpara Bakra songo donggipa Juri Maharini chra parakataha.