SHILLONG: National Livestock Mission-ni ‘Rural Backward Piggery Scheme’-ni ning·o jile kae cha·enggipa manderangna suale on·enggipa wak bi·sarangni sianiara mongsongbate salruraani a·selsa ong·enga ine Sombar salo, a·dokni Chief Minister Conrad Sangma talataniko on·angaha.
“Ia wak bi·sarangko a·songni dingtang dingtang bakrangoniko sakgni salgittam nangpile ra·bana gita nangenga aro changsano mang 1000-mangni gita wak bi·sarangko chel·begipa biaprangoniko ra·bana nangengani a·selsa ia wak bi·sarang sienga,” ine Chief Minister, kobor ra·timgiparangna parakataha.
Gipin biaprangoniko ra·baenggipa wak bi·sarangna name simsak nirokanirangko on·na man·jaengani a·selba ia wak bi·sarang sienga ine Sangma aganaha.
Badiaba badiaba biaprango jile kae cha·enggipa manderangna sualenggipa wak bi·sarang sienga ine ku·rachakaniko on·angengon, ia wak bi·sarang, maiba sabisi dongani giminde sia ong·jaenga ine Chief Minister talataniko on·angaha.
National Livestock Mission-ni ‘Rural Backward Piggery Scheme’-ni ning·o jile kae cha·enggiparangna sorkarini suale on·gipa wak bi·sarang adita salrangni gisepon sienga ine koborrangko man·soahachim.
Wak bi·sarangko jilna gita suale on·ako man·gipa mitam manderangni parakatani gitade, mitam wak bi·sarangni ku·sikrango parirang aro be·enrango naritchekanirang dongskaachim.
“A·dok sorkarini ra·gatgipa ia piggery scheme-oniko chinga bang·en ka·dongsotokengachim indiba chingna suale on·anggipa wak bi·sarang siani a·sel chingna bang·en noksan ong·aha,” ine jile kae cha·enggipa manderang parakataha.