TURA: North Eastern Hill University-ni casual worker-rangko kamo regularise ka·chipkujaengani gimin Shillong aro Tura campus damgnion kam ka·giparang, re·anggipa Sombar salonin jingjengatna gita a·bachengtokaha.
Koborko on·ani gitade, NEHU Tura campus-o kam ka·enggipa sak 200-mangni casual worker-rang donga aro uamangoni mitamde casual worker ong·e kamko ka·a da·o bilsi 30-mang ong·pilengahachim.
Indake ong·genchimoba, ia casual worker-rangko da·onan regularise ka·chipkujaengani a·sel kam ka·enggipa manderang bang·gija dormaharangkosan man·tokpaengani gimin Shillong aro Tura campus damgnion kam ka·giparang NEHU-ni kosako raken jegalanirangko dakangtokaha.
Koborko on·ani gitade, Supreme Court-ni on·gimin niam ‘Equal pay for equal work’ ba apsan kamna apsan dormahao pangchake, NEHU-o kam ka·enggipa casual worker-rang, an·tangtangni kamko regularise ka·china gita 2019 bilsionin dabina gita a·bachengahachim aro kam ka·enggiparang changni chang iani bidingo NEHU-ni dilgiparangna gisik ra·ataniko on·angahaoba da·onan uamangni dabianirangko knachakkujaengachim.
NEHU-ni casual worker-rang, Sombar salo badge gisimko gane jingjengataha aro da·o kamrangko ka·gija aro poster-rangko tape jingjengatangkuna manchienga ine u·iataha.
NEHU Tura campus-o peon-ni kamko ka·enggipa Mebarson Sangma-ni kobor ra·timgiparangna parakatani gitade, uni NEHU-o kam ka·ani da·o bilsi 20 batpilengahachim indiba da·onan uko kamo regularise ka·kujani a·sel aro uni dormaharangko bariatkujaengani a·sel ua an·tangni nokdangko chalaianio bang·a neng·nikanirangko chagrongna nangengachim.
Iani bidingo NEHU Tura campus-ni gital Pro-Vice Chancellor Sujatha Gurudev-o sing·sandion, Tura campus-o kam ka·enggiparangni dabienggipani bidingo ua NEHU-ni Vice Chancellor-na u·iataha ine parakataha.
“Iani bidingo anga Vice Chancellor-na u·iatmanaha aro adita salrangna skang Vice Chancellor-ni Tura campus-ona re·baani somoioba kam ka·giparang, unbaksa agangrikna cholko man·aha. Anga bebera·a ia neng·nikaniko chinga bakan namatna man·gen,” ine NEHU Tura campus-ni PVC parakataha.
