SHILLONG: Shillong songjinmani Sweeper’s Colony-o songdongenggipa manderangko Them Iew Mawlong-oniko Bishop Cotton Road-o donggipa Shillong Municipal Board-ni quarter-rangona apjitani bidingo agan-chanchirimna gita da·al Bristibar salo, a·dok sorkari, Harijan Panchayat Committee (HPC) baksa tom·na sienga.
Iani bidingo kobor ra·timgiparangna u·iatengon, Sweepers colony-o songdongenggipa manderangko Bishop Cotton Road-ona apjitangna gita High Level Committee (HLC)-ni manchianiko ia tom·anio a·dok sorkari, HPC-ni dilgiparangna u·iatgen ine a·dokni Urban Affairs Minister Sniawbhlang Dhar parakataha.
Sweepers Colony-o songdongenggipa nokdangrangko SMB-ni quarter-rangona apjitna gita tarigimin blueprint-ko adita salrangna skangsan, Urban Affairs Minister Sniawbhalang Dhar, a·dokni Deputy Chief Minister aro HLC-ni Chairman Prestone Tynsong-na pakwate on·manahachim.
Urban Affairs department-ni on·gipa technical report-o parakani gitade, Sweepers Colony-ni ge 342 nokdangrangko ia apsan biapon ma·chakna man·aigenchim.
Urban Affairs department-ni tarigipa blueprint-o, ge 30-oni ge 40 flat-rang gnang dam 12 residential block-rangko rikna gita proposal-ko on·ahachim. Ia gital biapo acre 2.5 a·arang donga aro ia biapo gital building-rangko rikna gita gitcham building-ko pe·galskagnok.
Ia building-rangko rikani kamrangkode Harijan colony-o songdongenggipa manderang baksa chanchirimani ja·manosa a·bachenggen ineba Urban Affairs Minister parakataha.
