Homestay-ni bidingo M’laya Tourism aro Outlook salsani workshop-ko ong·atanga

TURA: World Tourism Day-ko maniani bak gita re·anggipa Mongolbar salo, Meghalaya Tourism, Outlook Responsible Tourism Future Forum baksa nangrime, ‘Homestay’-rangni bidingo salsani workshop-ko Tura-ni District Auditorium-o ong·atangaha.
Ia workshop-ni gnigipa session-o Tura-ni MP Agatha K Sangma, mongsonggipa sokgipa ong·e jinmana aganprakangengon, manderangko sokachakani kamrangan Tourism-ko tang·doatna mongsonggipa chol ong·a aro ia sorkari, a·doko Tourism-ko tang·doatna gita gisiko nange kam ka·enga ine parakangaha.
Manderangni janggi tanganiara nangchongmotgipa ong·genchimoba Tourism-ko tang·doatna kam ka·anio samtangtango ong·telaigiparangko nisigaljachina gita ua ‘Homestay’-rangko chalaienggipa manderangkoba didiangaha.
Nongalbibra-o donggipa Ja·riponchi Tourism Society-ni River Rafting Tourism-koba ia tom·anio ua oprake on·angjolaha.
Ia workshop-ko ong·atanio Meghalaya Tourism-ni Director CVD Diengdoh-ba jinmana aganprakengon, homestay-rangni gamchatgipa ong·ani gimin janapangenba, dingtangmanchagipa Meghalaya Homestays Scheme-ko a·dok sorkari ra·gataha aro da·o dongenggipa PMEGP-ko Tourism department-ni scheme-rang baksa chapate, Meghalaya Rural Bank baksa bakrimaha ine parakataha.
Meghalaya Tourism Infrastructures Development-na gong kror 750-ko ma·mong sorkari ra·chakaha ineba Diengdoh parakataha.
Ia workshop-ni skanggipa session-o West Garo Hills a·jani Deputy Commissioner Swapnil Tembe, mongsonggipa sokgipa ong·e jinmana aganprakangskaengon, Garo Hills-o nikkugijagipa biaprangko mesoke Tourism-ko tang·doatna cholrang bang·en donga ine parakangaha.
Bitchi gita dakgipa jolni churangko tang·doatna gita sorkari, gital excise rules-ni ning·o chu tarigiparangna licence minggniko on·aha ineba ia tom·anio Deputy Commissioner parakataha.
Ia workshop-ko ong·atanio jinmana aganprakanggipa gipin manderangara, Global Himalayan Expedition-ni Jaideep Bansal, Kerala a·doko donggipa Kabani Community Tourism & Services-ni Sumesh Mangalasseri, Outlook Group-ni Marketing Director Shrutika Dewan, Outlook Responsible Tourism Initiative-ni Project Editor Soity Banerjee, Garo Hills Tourism-ni Assistant Director Bulbully S Marak, West Garo Hills-ni Tourist Officer Ava Shereen Sangma aro gipinrang ong·a.