TURA: Samanda C&RD Block-ni ning·o MGNREGA-ni rama tariani kamko matchote ka·ja Williamnagar-ni A·chik Organisation for Social Welfare (AOSW), Budbar salo matnangataha.
AOSW-ni parakatani gitade, ia ramara Denggagre-oni Matchakolgre songona gari re·na man·e tarigipa rama ong·achim indiba ia ramako matchote tarigija tong·saonasan tariaiahachim.
“Chingni RTI ka·anina aganchakaniko on·ani gitade, ia project-ni ning·o gimik metre 400 ramako tarina gita nangachim indiba ia ramani metre 200-kosan tariaiahachim. Ia rama nalarangba dongna nangachim indiba ia ramao nalarangkoba tarijaha,” ine AOSW parakataha.
AOSW-ni kobor setimgiparangna seachi parakatani gitade, ia ramako tariani bidingo manderangni changni chang badi ka·anirangko man·ani ja·man, re·anggipa August 10 tariko Block official-rang, ia biapko nina re·angaha aro ia ramako seng·gnangan matchotate on·na ku·rachakaniko on·angahachim.
Indake ong·genchimoba, ia ramani tong·sako da·onan tarina a·bachengata dongkujaenga aro Block official-rangba ia biapona re·ange nipiltaia dongkujaenga ine AOSW matnangataha.
