SHILLONG: Meghalaya Government Lower Primary School Contractual Teachers Association (MGLPSCTA)-ni ning·o donggipa contractual skigiparangni dabianiko a·dok sorkari knachakjaengani gimin re·baenggipa October 6 tariko, Main Secretariat a·palo jingjengatangskana manchiangaha.
Da·o dipet MGLPSCTA-ni membor-rang, Shillong Civil Hospital junction-o donggipa Kiang Nangbah-ni statue sambao jingjengatengachim ine nikna man·a.
Ia contractual skigiparang, re·anggipa September 7 tarikonin Main Secretariat sambao asonge jingjengatengachim indiba Secretariat Hills-o Section 144 CrPC-ko ra·gatahani gimin skigiparangko district administration Secretariat sambao jingjengatna on·jahachim.
“Sukrobar salo chingni jingjengatani sal 23 gapaha aro chinga re·baenggipa October 6 tariko, chingni jingjengatani jasa gapengahani gimin Main Secretariat a·palo re·jome jingjengatna sienga,” ine Sukrobar salo, MGLPSCTA-ni president Birbor Riangtem, kobor ra·timgiparangna parakataha.
Riangtem-ni parakatani gitade, skigiparangko gitcham sorkaride 45 percent gape, nanggipa niamko chu·sokatchina gita Higher Secondary porikkako setaina aro Elementary Education-ni Diploma-ko dakna cholko on·ahachim indiba da·o NPP-chi dilenggipa MDA sorkaride, uamangko ra·galsrangenba MTET pass ka·gipa skigiparangkosa uamangni biapo rakkiskaahachim.
Gipin a·dokrangode contractual skigiparangkoba apsan dakgipa porikkarangko ra·ani ja·man, skigipani kamo rakkijringtokachim aro porikkako chu·sokgijagiparangkoba contractual skigipani kamko ka·na cholko on·kuachim ineba ua parakataha.
National Council for Teacher Education (NCTE) 2010-ni niam gitade, Class I-oni Class VIII-ona skigipani kamko ka·na gita komibeoba skigiparang TET-ko pass ka·na nangachim.
2020 bilsio Meghalaya sorkarini skigiparangna MTET-ko a·bachengatani somoio mitam skigiparangde bilsi 10 batpile kamrangko ka·sotokengahachim indiba MTET pass ka·gijagipa sak 800 skigiparangko a·dok sorkari, 2021 bilsini January jao kam bon·attokahachim.
