TURA: South Tura constituency-ni ning·o donggipa Nikwatgre gittimo rama tarianiko gitcham MLA John Leslee K Sangma champengatani a·sel da·o ia rama tarianiko dontongaha ine Nikwatgre gittimni manderang suk ong·gijaniko parakatenba, gittimo songdongenggipa manderangni namgnina ia ramako matchote tarichina PWD-ko didiataha.
Nikwatgre gittimni saksa Edonath Marak minggipa mandeni parakatani gitade, ia ramako tarichina gita gittimni manderang, gitcham MLA John Leslee K Sangma-ni somoionin dabitokengachim indiba ua gittimni nanganirangko chu·sokatani pal da·o rama tarie on·ako man·paengoba ua batesa rama tariako champengskaahachim.
“Rama tarianiko champengja indiba cement on·gimin ramao paver block ananikosa ua ong·nikja ine songbado parakataha indiba uni iandake rama tarianiko sing·doaniara gittimni manderangkosa gisik saatani gita ong·aha. Ia ramako tarichina chinga uni MLA ong·engmiting somoionin dabiengachim indiba ua somoio ua chingni dabianiko chu·sokate on·angchipjaha aro da·o batesa chingna rama tarie on·anikoba ua sing·dopangpilenga. Uni gimin chinga uni kamko raken jegalenga,” ine Marak parakataha.
Nikwatgre gittimo songdongenggipa manderangni namgnina ia ramako matchotate on·china gitaba ua PWD official-rangko didiataha.
Nikwatgre gittimo tarienggipa ramani bidingo RTI-ko ka·ani ja·man, ia rama tarianiko dontongataha ine South Tura-ni gitcham MLA John Leslee K Sangma, sorkariko sing·doatahachim.
Ia ramara cement-chi tarigimin ramasa ong·a aro da·o ia tarigimin ramako concrete paver block-chi taridaptaiengani giminsa ua RTI-ko ka·ahachim indiba uni RTI ka·ani ja·man ia rama tarianiko dontongatskaaha ineba ua parakatahachim.
Uni RTI ka·ani ja·man, ia rama tarianiko department dontongatahaon, NPP-ni dilgiparang aro membor-rang, Nikwatgre-o tom·aniko ong·atangenba, rama tarianiko champenga ine ukosa matnangskaaha ineba Sangma parakatahachim.
