TURA: Re·anggipa September-ni 30 tariko, Tura-ni BJP MDC Bernard N Marak-ni case-rangni gimin Meghalaya High Court-o hearing-ko dakangenba, uni minggni case-nade jaminko on·aha.
Marak-ni jamin man·gipa case minggniara, Arms Act aro Immoral Trafficking ba mande palbadinganio nangchakegipa case-rang ong·achim.
Iana skangba, Tura-o dokkan dakenggipa manderangoniko Marak-chi dilenggipa Meghalaya Chamber of Commerce (MCC)-ni niam gri tangka paisarangko gile ra·engani a·sel manderangni nangchongmotgipa aro cha·ani bosturang dam rakbatenga ine matnange uni kosako case ka·gipani bidingoba ua jaminko man·ahachim.
Jaminna dorgasto galaniko West Garo Hills a·jani District & Sessions Court jechakahani gimin Marak-ni jikgipa, jaminna Meghalaya High Court-o dorgasto galskaahachim aro uandaken September-ni 30 tariko Marak-ni minggni case-na High Court, jaminko on·angaha.
Indake ong·engon, Bernard-ni kosako POCSO-ni ning·o ka·gipa case-rangba da·o bangki dongkuenga aro ia case-rangko Puja chuttini ja·man High Court, hearing dakangskanaba gnang ine kobor on·timgiparang u·iataha.
Tura Edenbari-o donggipa ‘Rimpu Bagan’-o me·a me·chikrangko ong·gija dake rona on·enga ine matnangako man·gipa Tura-ni MDC aro BJP Meghalaya-ni state vice president Bernard Rimpu N Marak-ko UP a·doko rim·ani ja·man July jani 29 tariko skanggipa changna kachario mikkangpaatahachim.
An·tangko bame on·china u·iatani ja·manoba katchipe dongahani gimin aro ia bilsini February jao me·chik bi·sa saksako uni bagano drae til·ekgipani bidingo District Sessions Court-ni gita uni kosako non-bailable arrest warrant-ko on·ahani gimin police-rang, uko rim·china gita a·song gimikni police station-rangna u·iataniko on·atani ja·man Tura-ni BJP MDC aro BJP-ni Meghalaya state vice president-ko Uttar Pradesh a·dokni Hapur a·jaoniko police-rang rim·na man·ahachim.
Marak-ko rim·ani ja·manoba police-rang, Rimpu Bagan-ona re·ange am·sandianirangko daktaion, gopretna jakkalgipa bosturangko aro adita silchidarerangkoba man·ahachim.
