SHILLONG: Meghalaya a·dokni ramarango da·ororo niam gri tangka gile ra·anirang dongjaha ine dilgiparang a·kangengoba, Guwahati-oni Shillong-ona dakbagipa ramao adita sak chadamberangni niam gri tangka gile ra·ako nikna man·taiaha.
Koborko on·ani gitade, Robibar wal 12:00 bajini ja·man, Jorabat-o donggipa National Highway ramao, adita sak chadamberangni ‘gate tax’-ni bimingo, songreenggipa manderangoniko tangka gile ra·ako nikna man·aha. Robibar walo, kobor setimgipa mande sakgni, Guwahati-oni Shillong-ona re·baengmiting somoio Jorabat bate, chu pekgipa sak 3-4 chadamberang, gol·dikrangko ra·bite, uamangni driver-ko dongdipchina ge·etaha. Gariko saltimgipa mande, gariko neng·takon, paksamgnionin sak 3-4 chadamberang, ong·katbaenba, ‘no entry’-o re·enga ine songrebaenggipa manderangko sing·doaha.
Ia ramako songni dilgiparang, ‘no entry’ dakataha ine ia chadamberangni aganani gimin maikai national highway ramao ‘no entry’ dakna man·a ine sing·doskaon, uamangni aganako manijaode gong 100-ko ‘gate tax’ dake gamna nanggen ine chadamberang dabiskaaha.
Uamang badia songni ine sing·oba chadamberang aganchakna jechakahani gimin songrebaenggipa manderang, an·tangtangni janggirangna kenchakenba chadamberangna gong 100-ko game, ua biaponi re·baaiaha ine kobor on·aha.
Ia a·selni bidingo Ri Bhoi a·jani police-rangna ku·sikchide aganbaaha indiba lekka seachide badi ka·aniko dakjaha ineba kobor on·aha.
