Damas jolo gital Block-ko songchina dabie jolni manderang re·joma

RESUBELPARA: North Garo Hills a·jani Damas joloba gital C&RD Block-ko songe on·china gita dabie Sukrobar salo jolni manderang, jinma tom·bimonge re·jomaniko ong·atangaha.
Jinma re·jomaniko ong·atna skang Damas Higher Secondary School kal·chakramo jinma tom·aniko ong·atangchengaha, jeon Damas jolo songdongenggipa bang·bea manderang bakko ra·angtokaha.
Koborko on·ani gitade, Damas C&RD Block-ko songe on·china gita 2012 bilsimangon Damas Youth Forum (DYF) dol dabidilchengahachim aro Sukrobar salo ia dabianiko dake jinma re·jomaniko Damas Area Development Committee (DADC) dakdilangskaaha.
Damas jolara Resubelpara Block aro Kharkutta Block-oni chel·grikani a·sel dingtang dingtang kamrangko ka·anio neng·nikanirangko man·tokna nangengani gimin Damas jolo songdongenggipa manderang, Resubelpara aro Kharkutta Block-oniko bak dake dingtang block-ko songe on·china dabitokskaenga.
“Meghalaya a·dokni pilak constituency-rangoni Mendipathar constituency-osan an·tangtangni C&RD Block dongpakuja. Chinga dingtang block-na 2012 bilsionin dabina a·bachenge 2018 bilsioba bilaken dabiangahachim indiba da·alona kingkingan chingni dabianiko a·dok sorkari chu·sokate on·kujaenga,” ine DYF-ni president John Navy G Momin parakataha.
Re·anggipa bilsiosan, Mendipathar constituency-ni ning·o gital C&RD Block-ko kulina gita biapko sandichina C&RD department, North Garo Hills a·jani district administration-ko u·iataha aro uandaken North Garo Hills a·jani ADC, ia songona re·ange biapko niangaha aro ia biapko songni Nokmaba sorkarina on·gilataha ine kobor on·aha.
“Ia joloba gital block-ko kulie on·genchimode ia jolo songdongenggipa manderangna namroro silroroani cholrangko ra·baani gita ong·gnok aro iani giminsa chinga da·alo jinma re·jome dingtang block-na dabina nangnikaha,” ine re·jomaniko dilgiparangoni saksa parakataha.
Uamangni tom·tome dabianiko sorkari knachakjagenchimode mikkangchi jolni manderang bilakbate jingjengatanirangko dakangskagen ine DADC-ni secretary Julius Sangma parakatskaaha.
“Da·alo chinga Damas-o tom·e re·jomaha aro knalde North Garo Hills-ni headquarter Resubelpara-o jinma re·jomangskagen. Iani ja·manoba chingni dabianiko knachakjagenchimode chinga Shillong-ona re·ange dabiangskagen,” ine Sangma parakataha.