SHILLONG: Meghalaya a·dokni skanggipa five-star hotel Vivanta Meghalaya-ko Sukrobar salo, a·dokni Chief Minister Conrad K Sangma, do·ga oe on·angaha aro ia hotel-ko do·ga oe on·angani somoio dingtang dingtang cabinet minister-rang, Rajya Sabha-ni MP WR Kharlukhi, a·dokni Director General of Police Dr LR Bishnoi, MTDC-ni Chairperson aro sorkari official-rangba dongpae bak ra·angaha.
Ia Vivanta Meghalaya Hotel-ko do·ga oe on·angani somoio a·dokni Chief Minister Conrad Sangma, jinmana aganprakangengon, a·dokni skanggipa five-star hotel-ko kulina man·ahani gimin ian a·dokni manderangna gisik ra·beani sal ong·gen ine janapatenba, ia hotel-ko 1986 bilsion rikna a·bachengahaoba ia sorkarini rakbee kamrangko ka·ahani a·selsa da·o ia hotel-ko matchotate on·na man·aha ine parakataha.
COVID-19-ni a·sel ia hotel-ko rikanio neng·nikanirangko man·ahaoba ia hotel-ko ia bilsio matchotatna man·aha ine dingtang dingtang dolrangko mittelpilangengon, ia Vivanta Meghalaya hotel baksana Marriot-ni Hotel Courtyard-koba a·doko kulina siengahani gimin ian a·doko Tourism-ko tang·doatna dakchakani ong·gnok ine Chief Minister parakataha.
“Da·alo ia hotel-ko chinga IHCL-na pakwate on·aha aro bakan ia hotel-ko sokgiparangna kulignok,” ine Sangma aganaha.
Ia Vivanta Meghalaya-ko square metre 8,800 ong·gipa biapo rikaha aro ia hotel-o ge 101 kuturirang baksana restaurant, coffee shop, bar, retail shop, banquet hall aro uandakgipa dingtang dingtang biaprangba donga. Ian Meghalaya Tourism Development Corporation (MTDC)-ni hotel ong·a aro ia hotel-ko PPP mode-o bilsi 33-na chalaina gita IHCL-na pakwate on·aha.
Mikkang bilsi 10-ni gisepo Meghalaya a·dokkoba nambatsranggipa dam 10 a·dokrangoni damsa ong·atna kamko ka·enga aro ia kamko ka·anio Tourism-ko tang·doataniba sorkarini mongsonggipa daitorangoni mingsa ong·enga ine janapatengon, Sohra, Jowai, Shillong, Umiam aro Tura jillarangko tourism-ni mongsonggipa biaprang dakatna sorkari miksongenga ine Chief Minister parakataha.
West Garo Hills a·jani Sakal A·duma, West Jaintia Hills a·jani Shnongpdeng, East Khasi Hills a·jani Sohra, Ri Bhoi a·jani Mawlyndep aro Nongmahir, West Khasi Hills a·jani Nongkhnum, West Jaintia Hills a·jani Thadlaskein aro South West Garo Hills a·jani Pelga Wario dal·dalgipa resort-rang baksana tourist-rangni rochakgipa biaprangko sorkari rikna sienga aro iana biap damprakon gong kror 5-oni gong kror 10-ko jakkalna sienga ineba Chief Minister parakataha.
