TURA: Bajengdoba-oni Aruakgre gita Jangrapara-ona dakanggipa ramako tarigija galchipe donengani a·sel songni nokni manderang dingtang dingtang kamrangna re·ruraanio neng·nikanirangko chagrongna nangtokenga ine Bajengdoba-ni Matgrik Do·mesal aro A·chik Youth Welfare Organisation (AYWO) dolrang parakataha.
Matgrik Do·mesal dolni president Metro S Bangshall-ni parakatani gitade, ia ramako bilsi 40-na skangan cho·ahaoba da·alona kingkingan sorkarini gita ia ramako tarie on·a dongkujani a·sel songni nokni manderang neng·nikanirangko man·tokna nangengani gimin re·anggipa Sonibar salo, songni manderang Matgrik Do·mesal aro AYWO dolni membor-rang baksa tom·aniko ong·atangaha aro ia tom·anio songni nokni manderang an·tangtangni neng·nikanirangko ia dolgnini membor-rangna agan-talate on·angtokaha.
“Ia ramako cho·chengaoni bilsi 40 batpilengahaoba, ia bilsi 40-ni gisepo ong·anggimin sorkarirang aro MLA-rangba ia ramako tarie on·na gisik nangjaha aro iani a·selan skulrangchi re·enggipa bi·sarang aro mongsongbate sagipa ding·giparangko sanchakram biaprangona ra·anio aro pale sim·e cha·giparangba gari gorarang dongjani a·sel ja·arangchisa an·tangtangni game ge·e man·gipa bosturangko palna sim·na gita ra·angna nangtokenga,” ine Matgrik Do·mesal-ni president parakataha.
Ia ramako ta·raken tarie on·china gitaba dolgni NGO-rang baksana jolo songdongenggipa manderang, a·dok sorkariko didiataha.
