TURA: West Garo Hills a·jani Kherapara primary health centre (PHC)-ko community health centre (CHC)-ona ra·dona gita Sombar salo, a·dokni Health Minister James PK Sangma pangchakaniko songe on·angaha aro ia pangchakaniko songe on·anganio Gambegre-ni MLA Saleng A Sangma, Babelapara-ni MDC Rakesh A Sangma aro gipin dilgiparangba dongpae bak ra·angaha.
Kherapara CHC-na a·arangko Kherapara-ni Nokma indin on·gilatahachim ine nikna man·a.
Ia pangchakaniko songe on·angani somoio a·dokni Health Minister, jinmana aganprakangengon, ia PHC-ko CHC-ni gadangona ra·dona gita kamrangko ka·dilahani gimin Gambegre-ni MLA Saleng Sangma-ko aro ia jolrango songdongenggipa manderangni nangnikani gita ia PHC-ko CHC-ona ra·dona on·engahani gimin a·dokni Chief Minister Conrad Sangma-koba mittelpilangaha.
Da·o dipet Kherapara PHC-o medical officer sakgnisan manderangna sanna bananirangko on·enga ine janapatengon, ia PHC-ko CHC-ona ra·doatahaode ia biapo surgeon, gynaecologist, anaesthesia, ophthalmologist aro uandakgipa doctor-rang baksana nurse aro gipin kam ka·giparangba bang·batgnok ine Sangma parakataha.
Manderangni namgnina a·dok sorkarini on·enggipa dingtang dingtang an·seng baljokani cholrang, jekai Chief Minister’s Safe Motherhood Scheme, Transit Home for High Risk Pregnant Women aro uandakgipa dingtang dingtang scheme-rangko ra·china gitaba ua jolni manderangko didiangaha.
Mandena an·seng baljoke donganiko nangchongmota ine janapatengon, mande an·seng baljokgipa ong·jagenchimode ia jolrango je gita namroro silroroani sokbagenchimoba indinsa ong·gramaigen ine Health Minister parakataha.
Ia tom·anio Gambegre-ni MLA Saleng Sangma-ba jinmana aganprakangengon, Kherapara PHC-ko CHC-ona ra·doatchina bi·aniko knachakahani gimin a·dokni Chief Minister Conrad Sangma aro Health Minister James Sangma-ko mittelpilangaha aro Kherapara-o PHC donggenchimoba Tura aro Dalu damgnian Kherapara-oni chel·grikani gimin bilongbate sagiparangko ra·ruraanio neng·nikanirangko man·na nangengachim ine talataniko on·angaha.
An·o donggipa me·chikrang an·pakani somoirango siangbatengani gimin an·tangtangni jikgiparangko nambate nirok sandichina gitaba ua songni nokni me·aparangko didiangaha.
Noktangtango sagipa manderang dongon, ua mande bilongbatna skangan uko hospital-rangona ra·angchina gitaba ua songni manderangko didiangaha.
