SHILLONG: Meghalaya Democratic Alliance (MDA) sorkariko dilenggipa National People’s Party (NPP) aro MDA-o bakrimenggipa United Democratic Party (UDP) dolrang, re·baenggipa 2023 bilsini Assembly election-na candidate-rangko sandina, seokna aro jinmana parakatna gita kamrangko a·bachengataha.
NPP-ni state president aro Rajya Sabha-ni MP WR Kharlukhi-ni parakatani gitade, candidate-rangko seokna NPP-ni election committee-ko songna kamrangko a·bachengaha.
“Chingni national president Conrad K Sangma-ni ge·etanio pangchake chinga election committee-ko songna kamrangko a·bachengengaha,” ine Kharlukhi parakataha.
Election committee-ko songahaon, party tikitna dorgastorangko on·na a·bachenggnok ineba Kharlukhi parakataha.
Election committee-ko antisani gisepon songe, candidate-rangko seokani kamrangko a·bachenggnok ine janapatengon, gipin dolrangoni bang·a dilgiparangan NPP-ona re·batokengani gimin candidate-na dilna nangani dongjawa aro candidate-ko a·dokni dam 60 constituency-nan seokna nanggen ine NPP-ni state president parakataha.
Re·baenggipa 2023 bilsini Assembly election-o bang·bata seat-rangko chee gital sorkariko rikna man·na gita ia election-o NPP doltangari susana miksongengachim.
Indake ong·engon, UDP-ni state election committee (SEC)-ba party tikitrangko sualani bidingo chanchina bakan tom·aniko ong·atna sienga ine parakataha.
UDP-ni general secretary Jemino Mawthoh-ni kobor ra·timgiparangna parakatani gitade, da·o ong·enggipa MLA aro MDC-rangko man·chape dingtang dingtang manderangni tikitna dorgastorangko galgipani bidingo chanchirimna gita adita salrangna skang, UDP-ni dilgiparang tom·aniko ong·atangaha.
“SEC ra·chakmanahaon chinga skanggipa candidate-rangni bimingrangko parakatgnok,” ine Mawthoh aganaha.
Da·o dipet UDP-ni dilgiparang election manifesto-ko tarienga ineba UDP-ni general secretary parakataha.
