SHILLONG: Meghalaya Police-ni headquarter-o garirango jakkalsretani gimin Trinamool Congress (TMC)-ni badi ka·aniko man·enba, a·dokni police officer GK Iangrai aro a·dokni gitcham director general of police (DGP) R Chandranathan-ko sing·sandina gita Meghalaya Lokayukta okamataha.
October 18 tariko Lokayukta-ni ge·etaniko on·angani gitade, Meghalaya a·dokni police officer GK Iangrai aro gitcham DGP R Chandranathan-ni kosako TMC-ni dilgipa Saket Gokhale-ni badi ka·aniko nimanaha.
TMC dilgipani badi ka·anio pangchake ia police officer sakgnini gimin hearing-ko dakna gita Meghalaya Lokayukta, re·baenggipa November 15 tarikko tik ka·e donangaha.
Meghalaya Police-ni headquarter-o garirangko breanio ong·gija dakanirangko aro gipin kam kamrango ong·gija dakanirangni gimin adita salrangna skangsan, TMC-ni national spokesperson Saket Gokhale, Meghalaya Lokayukta-na seachi badi ka·doangahachim ine nikna man·a.
Gokhale-ni Lokayukta-na badi ka·anio parakani gitade, Meghalaya Police headquarter-ni bregipa bol 29 gital garirangko darang officer-rangnaba on·jahachim aro ia garirangko Police department-o jakkalna gitaba on·jahachim. Ia garirangko a·dokni AIG (A) GK Iangrai-sa an·tangni kamrangna jakkalskaenga ineba Gokhale badi ka·doangahachim.
