TURA: West Garo Hills a·jao donggipa Batabari sub-centre-ko primary health centre-ona ra·dona gita Sukrobar salo a·dokni Chief Minister Conrad K Sangma, pangchakaniko songe on·angaha.
Batabari PHC-na pangchakaniko songe on·angani somoio Rajabala-ni MLA aro Meghalaya Planning Board-ni Chairman Abdus Saleh baksana jolo songdongenggipa manderangba dongpae bakko ra·angaha.
Batabari sub-centre-ko PHC-ona ra·dona gita pangchakaniko songe on·angani somoio a·dokni Chief Minister, jinmana aganprakangengon, Rajabala by-election-na uamangni campaign ka·engmiting somoirango Batabari-ni manderang, PHC-ko on·china dabitokahachim aro ia sorkari, Batabari jolo songdongenggipa manderangni nanganiko nike da·alo PHC-na pangchakaniko songe on·engaha ine parakangaha.
A·doko manderangna nambata sanna banani cholrangko on·anian ia sorkarini mongsonggipa daitorangoni mingsa ong·a ineba Chief Minister parakataha.
“Uni gimin da·alo Batabari sub-centre-ko primary health centre-ona ra·dona pangchakaniko songe on·anichi Batabari jolni manderangna nambata sanna bananirangko on·na ja·ku de·aha,” ine Sangma aganaha.
