Rama on·jaode vote-koba on·jawa, ine songni manderang kamikkenata

Rongjeng: Pilak a·gilsakni bako songko noko namdapata inon manderang namnamgipa ramarangko songrena aro badingchiwalna re·wilwatna man·aniko niksamsoa. Ia apsan dakgipa niksamsoanirangko, Adokgre, Mangsang aro Ronjeng song sepang jolo donggipa manderang dakahachim indiba gitalgipa ramarangko tarina gita gitcham ramako pe·genchimoba uamangna tarie on·anirangko dakjaha.
Indake km 44 ong·gipa rama ua jolo donggipa manderangni salantio re·wilwatna nanggipa ong·a, unbaksana Kharkutta aro Rongjeng constituency-o dongenggipa sak 50000 manderangna ia rama mongsonggipa ong·a. Rongjeng-oni, Nengkram-ona dakanggipa km 22 ramarangkode manderang jakkalna gita man·kuenga indiba rama tongsakode, ia bilsini ja 4 ba ja 6-rangna re·na man·jaani a·sel galchipe dona gita nangaha.
Indake, jolo donggipa manderang ramrang namjaani a·sel ka·o nange, rama namjaode vote-rangkoba on·jawa ine aganangaha, maina ramarangko tarie on·a gita uamangni agananiko ba dabianiko darang mandeba knachakjaha.
‘Chinga iani bidingon, Chief Minister Conrad Sangma-ko, 2019 bilsio grongaha aro ua obostarangko niatgen na·simang jajrengna gita nangjawa ine kurachakaha. Ramarangko namatna gita chinga uamangna bang·a somoirangko on·aha. Salantio chinga  maidakgipa neng·anikanirangko man·enga darangba masija aro iarangni gimin chinga, legislator-ko gronge agangrikanikoba dakaha,” ine Joint Action Committee (JAC)-ni president, Sebiush Marak aganangaha.
Indake ia ramako tarina gita, Mukul Sangma-chi dilgipa gitacham sorakarini somoion, kror 210-ko chamaha. Tangkarangko, NLCPR aro NEC-ni gita on·aha aro ramako tarina gita, gegni company, CCL aro BSC Infratech-na on·aha. Indiba, North East Council (NEC) darangnaba obostako masiatgija ia project-oni ong·kataha aro tangka kror 88-ko ra·angaha.
Kam ka·na miksongani jatchio, NEC-ni watgalani a·sel project-ni tangka kror 123-san dongrikaiaha. Indiba, NEC-ni katpilna skangba, gital ramako tarina gita gitcham ramako pe·e galmanahachim.
Jolo donggipa manderangni aganani gitade, km 22 mang chekgipa ramako 100 songrang re·na gita nanga aro salantio songrena gita ramarang namjaani a·sel namen neng·ani ong·a.
Ildek chiringni dolongko tarina gita tangka kror 22 rangko nangnaba dongachim aro ia dolongrangko name tarie on·genchimode jolo donggipa manderang an·tangtangni game ge·e man·anirangko altuen bazarrangona ra·ange palna gita man·gnokchim aro songko noko namroro silrorona gita dakchakgnokchim.
Jegalanirangko aro dabianirangko dakna gita jolo donggipa manderang tom·aniko ong·atsimna gita nangenga.
A·doko donggipa sakanti manderangni singna nanganide, gital ramarangko tarina gita rama gitachamko choe, a·dok sorkarira galchipe donaigenma? aro tarigenchim ong·ode badia bilsio aro basako ia ramarangko matchotatgen.