SHILLONG: Re·baenggipa 2023 bilsini Assembly election-o United Democratic Party (UDP)-oni susana gita tikitna dorgasto galenggipa candidate-rangni gimin UDP-ni state election committee (SEC)-na chanchigen ine Sombar salo UDP-ni general secretary Jemino Mawthoh parakataha.
Nongkrem constituency-oni susana gita Bindo M Lanong aro Lambor Malngiang sakgnian UDP-ni tikitna susaengani gimin UDP-ni general secretary, ia kattarangko parakataha.
UDP-ni saksa gitchambatsranggipa dilgiparangoni saksa Bindo M Lanong-de UDP-ni tikitko man·janaba gnang ine jajrengsoskaengachim.
Indake ong·engon, UDP-ni dilgiparang, Bindo Lanong-koba nanga gitan mande ra·a indiba tikitrangko sualanio dolni niamrangko ja·rikna nanga ine Mawthoh parakatskaaha.
Mawthoh-ni parakatani gitade, darangnaba mikkang niteani gri aro darangkoba gisik saatani gri niamrangko ja·rikesa UDP-ni tikitrangko candidate-rangna suale on·anggen.
Dingtang dingtang a·jarangoniko UDP-ni tikitna dorgastorangko man·soengaha ine janapatengon, ia dorgastorangko da·o nina a·bachengengaha aro UDP-ni state election committee-sa pilak constituency-rangnan tikitrangko nangani kri suale on·anggen ine UDP-ni general secretary parakataha.
“Tikitrangko suale on·ani giminde state election committee-sa bon·kame chanchianggen,” ine ua aganaha.
UDP-ni tikitko man·oba man·jaoba re·baenggipa 2023 bilsini Assembly election-o ua Nongkrem constituency-oni susagen ine adita salrangna skangsan a·dokni gitcham Deputy Chief Minister aro UDP-ni dilgipa Bindo M Lanong parakatahachim.
UDP-ni adviser aro nominate ka·ako man·gipa MDC BM Lanong, 2009 bilsion bon·kame seokako man·ahachim indiba uni ja·man changgni election-ode uko East Shillong constituency-ni manderang jegaltokaiahachim.
East Shillong-o chu·sokna man·jahani gimin ua re·baenggipa 2023 bilsio UDP-ni tikitchi Nongkrem constituency-oni susana gita kamrangko ka·chakatna a·bachengskaahachim.
1997 bilsionin ua UDP-na kakket ong·e dangdike on·engoba, iandake UDP-ni tikitko gipin candidate-na on·aniara una namen ka·donga gri ong·ata gita ong·skaahachim.
“Da·o dipet Nongkrem constituency-na UDP-ni candidate-ko paraksrangkujaengani gimin anga tikitko man·na ka·dongengkua indiba anga UDP-ni tikitko man·jagenchimoba ia election-o Nongkrem constituency-onin susagen,” ine Lanong parakataha.