SHILLONG: Re·baenggipa 2023 bilsini Meghalaya Assembly election-o Mawphlang constituency-oni susajawa ine United Democratic Party (UDP)-o napanggipa FKJGP dolni gitcham president Wellbirth Rani, Sombar salo parakataha.
UDP-o napani ja·man FKJGP-ni gitcham president da·o UDP East Khasi Hills-ni vice president ong·e kamko ka·skaengahachim ine nikna man·a.
Indake ong·engon, ua re·baenggipa 2023 bilsini election-o susajaoba UDP-ko bilakbatatna gita kamrangko ka·angskakugen ine Rani parakataha.
“Ia election-o angni susajaengani a·sel UDP baksa angni nangrimanio maming nangchakeani dongjawa maina anga pangnan UDP-ko bilakbatatna kamko ka·angkugen,” ine ua aganaha.
Re·baenggipa 2023 bilsini Assembly election-o da·o Mawphlang constituency-ni MLA ong·enggipa Eugeneson Lyngdoh susajagenchimode uni biapo, FKJGP-ni gitcham president, Mawphlang constituency-oni susaskanaba gnang ine jangbingbanganirangko knana gita man·ahachim.
Mawphlang constituency-oni susana gita UDP-ni mitam dilgiparang, People’s Democratic Front (PDF)-ni general secretary Auspicious Lyngdoh-ko seokskaengachim ineba nikna man·a.
Iani bidingo re·anggipa August jaon PDF-ni president Gavin Miguel Mylliem-ba, Auspicious Lyngdoh-ko Mawphlang constituency-oni susaatgen ine parakatmanahachim.