TURA: Re·anggipa October-ni 21 aro 22 tarikrango, A·chik Literature Society (ALS), NEHU Tura Campus-ni Garo Department baksa nangrime, A·chik ku·sik, sea jotani aro jatni dakbewal rikbewalni bidingo Regional Seminar-ko salgnina ong·atangaha aro ia seminar-ko NEHU Tura campus-ni Campus-in-Charge Prof Sujata Gurudev, a·bachengate on·angaha.
Ia regional seminar-ko a·bachengate on·angani somoio NEHU Tura Campus-ni Campus-in-Charge Prof Gurudev, tom·anio bak ra·giparangna aganprakangengon, Tribal-rangni sea jotani aro ku·agananio jakkalgipa kattarangni miksonganirang namen apala aro ning·tugipa ong·a aro ian jatni dakbewal rikbewal aro ma·ambiko mesoka ine parakangaha.
Ia regional seminar-ko ong·atanio A·chik Literature Society-ni president Prof Caroline R Marak-ba jinmana aganprakangengon, A·chikkuchi sea jotanirango bimang ong·ate seani aro am·sandie segipa lekkarangko tang·doatna nangengani gimin batanggimin somoirangoba A·chik Literature Society-ni gita Writers Meet aro workshop-rangko August, September aro October jarango ong·atangaha ine parakataha.
A·chikkuchi sea jotanirangko tang·doatna aro namroro silroroatna gita bilsiantian iandakgipa program-rangko ALS-ni gita ong·atenga ineba Prof Marak parakataha.
Ia salgnina ong·atanggipa regional seminar-o ICFAI aro NEHU Tura campus-o poraienggipa chatro chatrirangko man·chape dingtang dingtang chatro chatrirang gimik king 28 paper-rangko poraiaha. Ia sea jotanirango, A·chik ku·sik, sea jotani aro uandake jatni dingtang dingtang dakbewal rikbewalrangko man·gope seaha.
Bon·kamgipa salo, ia seminar-o bak ra·gipa manderangna, NEHU Tura campus-ni ning·o donggipa Management Department-ni Prof G Singaiah, Horticulture Department-ni Head Prof CP Suresh aro A·chik Literature Society-ni president Prof CR Marak-ni jakchi certificate-rangko suale on·angaha.
