TURA: Sukrobar salo, West Garo Hills District Tuberculosis Office-ni gita National Tuberculosis Elimination Program-ko Tura-ni District Tuberculosis Hospital-o ong·atangaha aro ia program-ko ong·atanio Tura-ni Lok Sabha MP Agatha K Sangma, TB sagiparangna cha·anirangko suale on·angaha.
Ia program-ko ong·atanio Tura-ni MP, jinmana aganprakangengon, 2025 bilsini gisepon TB sabisiko bon·atna gita India sorkarini nisanko donahani gimin West Garo Hills a·jaoba TB sabisiko bon·atna gita rakbee kamrangko ka·enganina TB hospital-ni doctor-rangko aro gipin kam ka·giparangko mittelpilangaha.
TB sabisiko bon·atna gita doctor-rang aro sagipa manderangni bakrimanikoba nangchongmota ine janapatengon, TB saenggipa manderang, somoi gita aro matchote samrangko ringgenchimode aro be·enna namgipa cha·anirangko cha·genchimode ia sabisiko namatpilna man·chongmotgen ine Sangma aganaha.
Ia program-ko ong·atanio West Garo Hills a·jani District Tuberculosis Officer Dr EA Sangma-ba jinmana aganprakengon, TB saaniko bon·atna ka·enggipa kamni report-ko jinmana mesokangenba, da·o dipet West Garo Hills a·jao TB saaniko bon·atna kam ka·ani 93 percent chu·sokgipa ong·aha aro kamko ka·anio chu·sokaniara 83 percent ong·e a·doko nambatgipa a·ja ong·enga ine parakataha.
TB saaniko bon·atna gita uamang sagipa manderangni nokrangchi re·e sanna bananirangko on·enga, dingtang dingtang songrango aro skul-college-rangoba awareness program-rangko ong·atenga ineba Dr Sangma parakataha.
Manderang jemangan gusuani, fever saani, walni somoio kramchi ong·ani, cha·na sikjani aro uandakgipa chinrang dongachim, TB Hospital-ona an·tangtangni sturangko porikka ra·e nina ra·bachina gitaba Dr Sangma didiataha. Je manderangan sanna bananiko ra·e TB saaoni chu·gimik nampilna man·enga, uandakgipa manderangnade dingtangmancha boksisrangko on·enga ineba District Tuberculosis Officer parakataha.
