SHILLONG: A·doko chadamberangna kamrangko ka·e cha·na cholrang dongjaenga ine matnange sorkarini kosako jegale FKJGP-ni rally ka·anio ba re·jomaniko dakanio dos gri rama jolo re·giparangko, uniform gangipa school bi·sarangko aro journalist-ko chadrapani gimin BJP State President, raken jegalataha.
FKJGP president-ni golmal ong·anina kema bi·ani gimin Mawrie, indine aganaha, “beben obosta ong·anina kema bi·ataniara namgipa ja·ku de·ani ong·a indiba kema bi·animangmang chu·ongja. FKJGP, dos dakgiparangko sandie police-na pakwatna nanga. Video-o nikna man·ani gita jemangan dos dakahachim, uamangko sandianio police-na dakchakna nanga.”
Rally-o jemangan golmal ka·aha, uamang jatni aro a·dokni bimingko nosto ka·giparang ong·a, iandakgipa obostarang social media-o gipahaon, a·gilsak gimikonan gipanga, jean Shillong aro Meghalaya-ni bimingko a·gilsak gimikni mikkango kratcha·atgipa ong·a. A·doko iandakgipa obostarang bilongen kratcha·ani ong·a, ine Mawrie aganaha.
Minggipin ia mamlao Home Minister-ko am·sandianiko dakchina mol·molataha ine janapate, police dolrangni iandakgipa obostako nirokna man·gijaniara, police dolni chu·sokgijaniko mesoka. Maidake a·dokni police dolrang, iandakgipa obostao jrip dongna man·a, a·dokni manderangni janggina chelchakaniko on·na daitoko jako ra·giparang, kamtangko nambate ka·a ong·ode namgen ine Mawrie, aganaha.
Iarangni gisepon a·dok sorkari, golmal ong·ao jokkom ong·giparangko dakchakna nanga aro dos dakgiparangko rim·na nangchongmota. Uandake public rally-rango mikkango mask gananiko champengna policy ba niamko donani giminba chanchianiko dakchina agan-ku·pattiaha.
A·gilsakni je biapoba ong·bo, kajia-golmal ka·achi darangba kamko man·ja ineba Mawrie aganaha.
