SHILLONG: Adita salrangna skang, Shillong songjinmao Federation of Khasi Jaintia & Garo People (FKJGP) dolni gita sorkarini kosako jegale re·jomaniko ong·atanio, dosgri manderangko kragija dake doka satahani gimin Meghalaya a·doko Armed Forces Special Powers Act (AFSPA)-ko ra·gatpiltaichina gita Silchar-ni mitam dolrang dabiangtokaha.
Meghalaya a·doko AFSPA-ko ra·gattaipilchina gita dabiangengon, a·doko iandake skatang dosgri manderangko doka satanio jak donggipa manderangni kosako maming ja·kurangko de·kujaengani gimin Meghalaya sorkarini kosako jegalaniko mesokna gita da·o dipet Meghalaya a·dokona re·bajachina gitaba Silchar-ni NGO-rang, Barak Valley-o songdongenggipa manderangko didiataha.
FKJGP dolni re·jomaniko ong·atanio dosgri manderangko doka sata dakahani gimin Hindu Chatra Sangha minggipa dolba raken jegalataha aro adita salrangna skang Diwali-na advertisement ka·anio Sohra-ko Cherrapunjee ine mingahani gimin Netflix-ko jegalanio Bengali-rangko British-rangni ‘chamcha’ ine aganahani giminba KSU-ko raken jegalataha.
Indake ong·engon, FKJGP-ni re·jomaniko ong·atanio dosgri manderangko skatang dake dokgipa mande saksani noksa aro video-rangko da·o social media-rango watpriprana a·bachengengaha.
Ia noksara T-shirt gipok aro longpant gipok gangipa chadambeni noksa ong·achim aro noksarango nikna man·ani gitade, ua an·tangni mikkangko katipe, jaksamsachi FKJGP-ni nisanko ra·bite, Dhanketi ramao mande sakantikon ga·tinga doka dakahachim.
Da·o dipet ia a·sel ong·anio jak donggipa manderangko rim·ama rim·kujaenga police-rangoni maming parakataniba dongkujaenga aro a·dokni Chief Minister Conrad Sangma-ba iani bidingo da·onan maming jegalani kattarangko parakkujaengachim.
