SHILLONG: Re·baenggipa 2023 bilsini Assembly election-o Nongkrem constituency-oni susana gita Nongkrem-ni MLA Lambor Malngiang, United Democratic Party (UDP)-ni tikitna ku·mitdu du·akon ine UDP-ni chief advisoe Bindo M Lanong, an·tangni chanchichipenganiko parakataha.
“Assembly election-o susana gita Malngiang-na UDP-ni tikitko on·ani maming ortokon angade nikjaenga. Haida ua UDP tikitko man·na gita tangka paisarangko gamahakon,” ine Sonibar salo Lanong, an·tangna tikitko on·jahani gimin suk ong·gijaniko parakataha.
Re·baenggipa 2023 bilsini Assembly election-o Nongkrem constituency-oni susana gita UDP-ni tikitko man·jahani gimin Lanong, Independent candidate ong·e susaskana manchiangaha.
Ia election-na namkala candidate-ko seokgenchimode ua UDP baksa kamko ka·rimna kusi ong·aigenchim ineba ua aganaha.
“Dolsaoni dolsaona katjojoe dongenggipa mande baksa maikai anga kamko ka·rimna man·gen? 2003 bilsio ua KHNAM dolni tikitchi susae chegipa ong·ahachim aro uni ja·man ua Congress doloniba susaaha aro 2018 bilsioba ua Independent candidate ong·e susaenba chegipa ong·ahachim,” ine Lanong parakataha.
“Angni sing·anide maio pangchake una UDP-ni tikitko on·aha? Iako anga ra·chakna man·chongmotja aro bameba on·jawa. Anga tikitko man·jahani gimin gipin dolrango napjawa indiba Independent candidate ong·e susaaigen,” ine UDP-ni chief adviser aganaha.
