TURA: Mongolbar salo, Border Security Force (BSF) aro Border Guard Bangladesh (BGB)-ni sector commander-rang, West Garo Hills a·jani Kilapara-o donggipa Border Outpost (BOP)-o tom·aniko ong·atangaha.
BSF dolchipakko Tura-o donggipa BSF Sector Headquarter-ni Deputy Inspector General (DIG) Harmeet Singh dilangaha aro BGB dolko Bangladesh a·songni Mymensing-o donggipa BGB-ni Sector Commander, Deputy Director General Md Mahmudur Rahman dilangskaaha.
Ia tom·aniko a·bachengatna skang, dolgnini sector commander-rangan, Kilapara donggipa War Memorial-o sianggimin sipairangna mande ra·pilskaaniko dakna gita pulrangko donangaha.
Ia tom·anio BSF aro BGB-ni sector commander-rang apsan chanchirimengon, a·song damgnini simarango niam gri badingsrukanirang, niam gri an·cheng bikotani, niam gri a·song gipino matchurangko cha·ramatani aro uandakgipa dingtang dingtang kamrangni bidingo chanchirimangenba, mikkangchi a·song damgnini gisepo meli-nangrimaniko rakkiangkuna aro tom·tomaniko rakkiangna gita iandakgipa kamrangko dolgnian apsan nangrime chel·chakna tik ka·angaha.
