SHILLONG: Meghalaya a·dokni dingtang dingtang biaprango donggipa private company-rango joltangni chadamberangna 80 percent biapko chame donchina dabianiko sorkari knachakjaengani gimin re·baenggipa November-ni 4 tariko Hynniewtrep National Youth Movement (HNYM), Shillong songjinmani Main Secretariat mikkango asonge jingjengatangna manchiangaha.
HNYM-ni president Louis Dohtdong-ni kobor ra·timgiparangna parakatani gitade, a·dokni private company-rango 80 percent-kode joltangni chadamberangna chame donna gita dingtangmancha niamko ra·gatchina mol·mole, re·anggipa October-ni 20 tarikon uamang a·dokni chief minister Conrad K Sangma-na memorandum-ko on·ahachim.
“Private company-rango joltangni chadamberangna 80 percent biaprangko kangna gita niamko ra·gate on·china mol·molahaoba a·dok sorkari aro chief minister, chingna maming aganchakanirangko on·kujaengani gimin chinga November-ni 4 tariko Secretariat mikkango asonge jingjengatangna tik ka·aha,” ine HNYM-ni president parakataha.
Main Secretariat sambao dingtang dingtang dolrangni jingjengatanirangko champengna Section 144 CrPC-ko East Khasi Hills a·jani district administration ra·gatahaoba uamang manigija sorkarini kosako jingjengatanggen ineba Dohtdong parakataha.
“Meghalaya a·doko bang·a chadamberangan kamrangko ka·e cha·na cholrangko man·jaengani gimin private company-rangoba a·dokni chadamberangna 80 percent biaprangko on·genchimode bewal chadamberangan janggi tangani cholrangko man·pagenchim,” ine ua aganaha.
Indake ong·engon, re·baenggipa November-ni 7 tariko Union Home Minister Amit Shah, Shillong songjinmaona re·baenga ine koborko man·soahani gimin uamang ua saloba apsan daken, Secretariat mikkango asonge jingjengatangna manchienga ine HNYM-ni president parakataha.
