SHILLONG: Himachal Pradesh a·doko ong·atenggipa Assembly election matchotahaon, Meghalaya a·doko National People’s Party (NPP)-chi dilenggipa Meghalaya Democratic Alliance (MDA) sorkario bakrimaniko watani bidingo ma·mongni Bharatiya Janata Party (BJP) dilgiparang chanchianggen ine Meghalaya BJP-ni state president Ernest Mawrie parakataha.
Mawrie-ni parakatani gitade, Himachal Pradesh-o ong·atenggipa Assembly election-o re·baenggipa November 12 tariko matchotengani gimin iani ja·man, NPP-chi dilenggipa MDA sorkario bakrimaniko watama watjawa uko ma·mongni BJP dilgiparang chanchianggen.
MDA sorkario bakrimaniko jasani gisepon watgnok ine September jani 3 tarikon Meghalaya a·dokko nirokenggipa BJP-ni dilgipa M Chuba Ao parakatahachim ine nikna man·a. Uni ia kattako aganaoni da·o jagni batangpilengahaoba BJP dol, MDA-o bakrimaniko watskakujaengachim.
Indake ong·engon, NPP-chi dilenggipa MDA sorkario bakrimaniko watani ba watgijanide ma·mongo BJP-ko dilenggiparangni jakosa ong·a ine Meghalaya BJP-ni state president parakatskaaha.
Meghalaya a·dokni skotong Shillong songjinmao ong·anggipa a·selrangni gimin a·dokni BJP dol, ma·mongni dilgiparangna aro Home Affairs Ministry-na u·iataha aro a·doko tom·tomaniko ra·bapilchina gita ma·mong sorkari, a·dok sorkarina ge·etaniko on·ataha ineba Mawrie parakataha.
A·doko ong·enggipa obostarangko namatanide a·dok sorkarini daitoan ong·a ine janapatengon, October-ni 28 tariko ong·anggipa a·selara Home department, district administration aro police-rangni chu·sokgijani ong·aha ine Mawrie parakataha.
Tom·tomaniko rakkichina gita a·doko songdongenggipa manderangko mol·molatengon, Meghalaya a·doko aro mongsongbate Shillong songjinmao iandake so·sojengjeng ong·jringgenchimode tourism-ni gita tang·onanggnok maina a·doko bang·a manderangan tourism-o pangchake janggi tangenggiparangsa ong·a ine Mawrie parakataha.
Iandake so·sojengjeng ong·anirangko nikna man·rongengani gimin gipin biaprangoni re·baenggipa manderang kenna gita a·bachengengaha ineba BJP-ni state president parakataha.