SHILLONG: United Democratic Party (UDP)-ni Mawphlang constituency-o MLA ong·enggipa Eugeneson Lyngdoh, re·baenggipa 2023 bilsini Assembly election-o susajawa ine parakataha.
Budbar salo, UDP-ni gital Mawphlang Constituency circle-ko songani somoio kobor ra·timgipa manderang baksa agangrikengon, ua an·tangni neng·nikanirang dongengani gimin re·baenggipa bilsini Assembly election-o susajana gita tik ka·angaha ine Mawphlang MLA parakataha.
Iani bidingo ua an·tangni constituency-o donggipa UDP-ni dilgiparangna u·iatmanaha ineba Eugeneson aganaha.
Indake ong·genchimoba, 2023 bilsini Assembly election-o Mawphlang constituency-oni susana gita UDP, candidate-ko sandina a·bachengatgnok ine Eugeneson parakatskaaha.
“Candidate-rangni dorgastorangko man·soahaon party tikitko on·na gita chinga candidate-rangni dorgastorangko name nipilanggen,” ine UDP MLA parakataha.
2023 bilsini Assembly election-o ua susajaengani gimin UDP-ko bilgribatatani gita ong·genma ine sing·on, UDP-ni namgninasa ua ia ja·kuko de·aha ine Eugeneson parakatskaaha.
“UDP-ni candidate-ko cheatna gita anga an·tangba rakbee kamko ka·gen,” ine ua aganaha.
Mikkangchi ua maiko dakna miksonganirang dongenga ine sing·on, da·o dipet ua iani bidingo name chanchikuja ine Lyngdoh parakataha.
Re·baenggipa 2023 bilsini Assembly election-o UDP dol, People’s Democratic Front (PDF)-ni general secretary Auspicious Lyngdoh-ko Mawphlang constituency-oni susaatskana miksongenga ine adita salrangna skangsan koborko man·soahachim.
