SHILLONG: Home minister Lahkmen Rymbui-ni mijal salni bako aganani gitade, district administration-ni gita nama ine nikgenchimode, section 144 CrPC-ko ra·galkujawa.
”District administration, section 144 CrPC jolni obostarangko nigrikesa ra·gataha uni gimin nanga dipet uamang iako ra·galkujawa,” ine dingtang dingtang pressure group-rangni ra·galchina aganchakani gita mijal salni bako aganangaha.
”Jolo mai obosta ong·enga aro tom·tomama tom·tomjaenga ua pilako nigrike, district administration kamko ka·anggen aro nangani kri ra·galna nanga ong·ode ra·galgen,” ine Home Minister aganangaha.
Ra·galani gimin singaniko dakon, ua indake aganangaha,”Da·al ra·galgenma, knal ra·galgenma chinga agana gita man·ja maina pilakan obostaosa pangchaka aro ia pilakon district administration nigrike ka·anganiko dakgen.”
Indake, unemployment ba kamrangko man·jaenganina, Federation of Khasi Jaintia and Garo People (FKJGP) re·jomaaniko ong·atani somoio, an·tangtangni mikkangrangko ka·tipe re·jomae ramram manderangko dokaniko chelchakna ja·manchakani ja·mano, district administration, indakgipa ja·kurangko ga·na nangaha.
Law and order-ko nina gita, Chief Minister Conrad K Sangma, Home Minister Lahkmen Rymbui, Home department-ni official-rang, Director-General of Police LR Bishnoi, East Khasi Hills District-ni Magistrate Isawanda Laloo aro gipin official-rang baksa tom·e chanchianiko dakaha aro chanchi ja·mano order ba ge·etanirangko man·taipikja dipet jinma re·jomaanirangko dakna on·jachina tik ka·angaha.
Tom·ani adita kontarangni ja·mano, District Magistrate, Section 144 CrPC-ko, NGO aro dingtang dingtang dolrangni skatang bilrangko jakkale re·jomae tom·tome dongenggipa manderangko chadrapaniko aro kajia golmal ong·aniko champengna gita ra·gatataha.
Indiba, dingtang dingtang pressure group-rang, section 144 CrPC-ko ra·galchina dabianirangko dakenga.
Section 144 CrPC-ko, district administration nangani kri jakkalgen: Rymbui
Date:
Share post:
