SHILLONG: Meghalaya a·doko mingnambatsranggipa aro gitchambatsranggipa college-rangoni damsa St Edmund’s College, ia bilsio bilsi 100 gapahaon, ia college-ni bilsi 100 gapaniko re·anggipa Sonibar sal dipet manichakatangaha.
Ia manianiko dingtangmancha Edmund Rice-ni mangkrongko oprakanichi a·bachengataha aro ia manianiko a·bachengatani somoio a·dokni Education Minister Lahkmen Rymbui, Shillong Archdiocese-ni Vicar General Rev Fr Richard Majaw, college-ni skigiparang, chatro chatrirang aro gipin biaprangoni re·bagipa manderangba bakko ra·angtokaha.
Ia manianiko a·bachengatanio Father Paul Pudussery, tom·bagiparangna aganprakengon, a·gilsako dingtangroroengani gimin talataniko on·angaha.
Gital kolrangko jakkalanio chatro chatrirang, an·tangtangko nokkol ong·atjachina indiba an·tangtangko mikkangchina tarisamsona gitasa jakkalchinaba ua didianiko on·angaha.
Ia tom·anio a·dokni Education Minister Lahkmen Rymbui, jean ia college-ni gitcham chatroba ong·achim, jinmana aganprakangengon, maikai ua ia college-o poraie an·tangko tarina man·aha, uarangni gimin agan-talataniko on·angaha.
Uni college-o napengmiting somoirango uni chagrongna nanggipa a·selrangni gimin gisik ra·atpilangengon, ua ia college-oniko somoiko ja·rikani, class-ona re·bajringna nangani aro simsakna nangani gimin skie ra·aha ine Rymbui parakataha.
An·tangtangko mikkangchina tarisamsoengon, pangnan susagrikgiparang ong·china aro dingtanganiko ra·chakchina ua chatro chatrirangko didiangaha.
Ia college-ni bilsi 100 gapaniko manichakatanio college-ni choir aro gipin dolrangba gitrangko ring·e aro gipin dakmesokanirangchi manderangko an·saoatangaha.
