RESUBELPARA: North Garo Hills a·jani Bajengdoba-o community health centre (CHC)-ko rikna gita Sombar salo, a·dokni Health & Family Welfare Minister James PK Sangma-ni jakchi pangchakaniko, Bajengdoba primary health centre (PHC)-o songe on·angaha.
Bajengdoba CHC-na pangchakaniko songe on·angani somoio a·dokni Health Minister, jinmana aganprakangengon, Bajengdoba PHC-ko CHC-ona ra·doatchina gita Bajengdoba-ni MLA Pongseng Marak, changni chang didiahani giminsa uni proposal-ko sorkari ra·chakaha aro da·o CHC-ko rikna gita pangchakaniko songe on·aha ine parakataha.
“Bajengdoba PHC-ko man·aoni da·o bilsi 33-ni ja·man CHC-ko man·engahani gimin ia jolo songdongenggipa manderangna namen kusini somoi ong·enga. Bajengdoba songara, National Highway ramao ong·e bang·en a·sel ong·anirangko nikna man·rongani gimin ia PHC-ko CHC-ona ra·doataniara jolni manderangnasan ong·aigija da·o gita a·sel ong·e nanggitikgipa manderangnaba bang·a namgni ong·gnok,” ine Sangma aganaha.
Health Minister-ni parakatani gitade, Meghalaya a·dokko man·aoni bilsi 50 gapaha aro a·dokko man·chengaoni bang·a kamrangon namroro silroroaniko nikna man·engoba, sanna banani lekka porani, rama jal·langrangko tariani aro uandakgipa kamrango neng·nikanirangko man·na nangkuengachim.
COVID-19 sajinmani somoio dingtang dingtang neng·nikani aro ra·bianirangko chagrongna nangaha ine janapatengon, da·o gita sajinmani somoirango manderangko nambate nirok sandina aro nambata sanna bananirangko on·na gitasa sorkari, dingtang dingtang health centre-rangko ra·dona a·bachengataha ine Sangma parakataha.
MHIS-ni ning·o namgnirangko man·enggipa manderangna gong lak 5-oniko gong lak 30-ona bariataha aro ia scheme-ni ning·o out-patient department (OPD)-koba man·chapengaha ineba Health Minister parakataha.
Bajengdoba CHC-ko rikna pangchakaniko songe on·angani somoio dongpae bakko ra·anggipa gipin manderangara, Assembly-ni Deputy Speaker Timothy D Shira, Bajengdoba-ni MLA Pongseng Marak, Kharkutta-ni MLA Rupert Momin, North Garo Hills a·jani Deputy Commissioner RP Marak, North Garo Hills-ni Superintendent of Police (SP) Shailendra Bamaniya ong·a.
