SHILLONG: An·o donggipa me·chikrangko sechimongna ra·gatgipa Meghalaya’s Outcome oriented Transformation in Health, nutrition, Education & Rural development Programme (MOTHER) application-chi health centre-rango an·pakaniko bariate, Maternal Mortality Rate (MMR) ba an·o donggipa ma·giparangni sianiko komiatna man·skaengaha.
Health-ni Additional Secretary Ramkumar S-ni parakatani gitade, ia MOTHER app-ko ra·gatna skangde an·o donggipa me·chikrangni gimin somoi gita koborrangko man·jae, an·o donggipa me·chikrangko nirok sandianio neng·beani ong·achim aro an·o donggipa me·chikrangni gimin segatanirang donggenchimoba, lekkarangosa aro register-rangosa segataiani gimin name tik ong·a man·rongjachim.
Indake ong·engon, an·o donggipa ma·giparangni an·seng baljokaniko nirok sandina aro an·o donggipa me·chikrangko naljokani gnang an·pakna dakchakna gita Meghalaya sorkari, ia MOTHER app-ko 2019 bilsio a·bachengataha.
Ia MOTHER app-ko ra·gatani ja·man, an·o donggipa me·chikrangni bidingo aro ANM-rangni doctor-rangna aro health official-rangna u·iatanirangko somoi gita man·soe, da·o an·o donggipa ma·giparangko nambate nirok sandina aro health centre-rango an·pakna cholrangko on·na man·engaha.
Ia MOTHER app-ko South West Garo Hills a·jao a·bachengatchengaha aro ia app-ko a·dok gimiko ra·gatna skangan jadokni gisepon health centre-rango an·pakniko 44 percent-oniko 76 percent-ona tang·doatna man·aha.
Ia MOTHER app-ko ANM-rang, an·tangtangni mobile phone-rango jakkale, an·o donggipa me·chikrangni gimin somoi gita koborrangko ra·e nirok sandina man·engaha.
