TURA: 2023 bilsini January 1 tarikko qualifying date dake electoral roll-rangko nipilna tarigimin Draft Electoral Roll-rangko Budbar salo, West Garo Hills a·jani Deputy Commissioner Swapnil Tembe, dingtang dingtang political dolni dilgiparangna, Tura-ni DC office-o suale on·ataha.
Ia tom·anio West Garo Hills a·jani Deputy Commissioner, BLO Kit, SSR form, draft roll aro gipinrangkoba booth level officer-rangna suale on·atjolaha.
Ia tom·aniko ong·atanio Deputy Commissioner Swapnil Tembe, dingtang dingtang political dolni dilgiparangna aro election official-rangna aganprakengon, re·baenggipa bilsion election-ko ong·atengani gimin bilsi sokgimin manderangko electoral roll-rango biming segatna aro segualanirang donggenchimode taridapna gita electoral roll-rangko nipilna nangchongmotenga ine parakataha.
Draft electoral roll-rango segualanirang donggenchimode uarangni nipilenba taridapchina gita ua booth level officer-rangko didiataha.
Re·baenggipa bilsini election-na SVEEP-ni kamrang, summary revision aro uandakgipa kamrangko ka·na tarisamsoanirangko a·bachengataha ine janapatengon, ia kamrangko boja dake ra·jachina indiba re·baenggipa bilsini election-ko name chu·sokgipa ong·atna gita an·tangtangni daitorangko ma·sie kamko name ka·china gita Tembe didiataha.
West Garo Hills a·jao re·baenggipa 2023 bilsini January 1 tarikko qualifying date dake tarigimin Draft Electoral Roll-o dam 537 polling station-rang aro sak 356954 elector-rang dongachim ine nikna man·a.
Ia tom·anio dongpae bakko ra·anggipa gipin manderangara, DRDA-ni Project Director Dolrich Berin G Momin, West Garo Hills a·jani Additional Deputy Commissioner (Election) Rojalinda D Shira, ADC Winje Momin, ADC Mary Liza Marak, Extra Assistant Commissioner (Election) RK Hajong aro gipinrang ong·a.
