A·doko tangka jakkalsretaniko bon·atna Congress dakgrikangkugen: Deborah

WILLIAMNAGAR: Meghalaya a·doko tangka jakkalsretani aro kam ka·sretanirangko bon·atna gita Congress dol rakbee kamrangko ka·angkugen ine Bristibar salo, a·dokni gitcham minister aro Williamnagar-ni gitcham MLA Deborah Marak, Congress dolni tom·bimonganiko Williamnagar-o ong·atanio parakataha.
Ia tom·bimonganio dingtang dingtang biaprangoni Congress dolna kam ka·enggipa sak 2500-mangni gita manderang tom·chimongbatoke Congress dolni bilko mesokangahachim.
Ia tom·bimonganiko Williamnagar Congress Bhawan-o ong·atangaha aro tom·anio Deborah Marak baksana Bajengdoba-ni gitcham MLA Brigady Marak, gitcham MDC Mahamsing Sangma aro gipin dilgiparangba bakko ra·angaha.
Re·baenggipa 2023 bilsini Assembly election-o Congress doloni susana sienggipa candidate-rang, chong·motan Songsak-ni candidate Champion Sangma, Mendipathar-ni Timjim Momin, Ampati-ni candidate Uttora Sangma, Chokpot-ni candidate Karak Sangma aro gipinrangba dongpae bak ra·angtokaha.
“Congress dol pangnan tangka jakkalsretaniko jegalgipa dol ong·a aro an·chingni a·doko chinga iako warachakangkugen. Congress dolan a·songo gitchambatsranggipa dol ong·a aro pangnan mangrake dongangkugen. Anga an·tangba Congress baksa ong·angkugen aro manderangna dangdike on·angkugen,” ine ia tom·bimonganio Deborah aganaha.
Deborah-ni aganani gitade, Lok Sabha-ni gitcham Speaker PA Sangma sagiba Congress dolo dilgiparang dongja ine pa·sikenba Congress dolko wate katahachim indiba bakan uni matnangani kakket ong·ja ine ua nikna man·ahachim.
“Apsan daken Mukul Sangma-ba dilgiparang dongja ine pa·sike Congress dolko wate kataha indiba ua bakan iako ma·sigen. Batanggimin bilsirango Congress dol mangrake dongaha aro mikkangchiba apsan daken bilake dongangkugen. Da·ororo chadamberang Congress dolona re·bae dilgipani kamrangko jako ra·engaha aro uamang mikkangchi rakbee kamrangko ka·enba Congress dolna chu·sokaniko ra·bagen,” ine Marak aganaha.
Re·baenggipa bilsini election-o susagrikanide Congress, NPP aro MDA-o bakrimenggipa dolrangni giseposan ong·aigen aro Trinamool Congress (TMC)-de susaani dongsrangjawa ineba ua aganaha.
PA Sangma sagini NPP dolna ‘ki·tap’ noksako nisan dake ra·ani gimin talataniko on·angengon, a·doko lekka porako tang·doatna aro namroro silroroani gital odhaiko sena miksonganiosa ua ‘ki·tap’ noksako ra·ahachim indiba da·alo NPP-ni ki·tap kingantion tangka paisa jakkalsretanirarakosa seskaaha ine a·dokni gitcham Congress Minister parakataha.