SHILLONG: Police department-ni nokrangko rikna chamatgipa tangka paisarangko jakkalsretanina rim·ako man·gipa police official GK Iangrai-ko Sonibar salo, District & Sessions Judge-ni special court, sal 13-na judicial custody ning·o donkuchina gita rai on·ataha.
Sadar Police Station-o National Emergency Response System (NERS)-ko rikna gita chamatgipa tangka paisarangko dingtang kamrangna jakkalsretani gimin rim·ako man·gipa GK Iangrai-ko Sonibar salo bichal ka·na gita kachario mikkangpaatahachim.
“Police official GK Iangrai-ko November 25 tarikona judicial custody ning·o donataha,” ine Iangrai-ni ukil P Yobin parakataha.
Dos dakgipa police official GK Iangrai-ni kosako Meghalaya Police-ni Crime Investigation Department (CID), Prevention of Corrution Act-ni ning·o mokordomako segatahachim aro iani bidingo sandirokna gita Special Investigating Team (SIT)-koba songe on·ahachim.
Shillong Sadar Police Station-o National Emergency Response System (NERS) Public Safety Answering Point (PSAP)-ko rikna chamatgipa tangka paisarangko jakkalsretanina FIR-ko ka·ani ja·man Iangrai-ko police-rang rim·ahachim.
NERS PSAP project-na Home Ministry, gong lak 95.78 tangkarangko watatahachim aro ia kamko a·dokni gitcham Assistant Inspector-General of Police (Administration) GK Iangrai jako ra·enba, completion certificate baksana gong lak 95.78-ni tol·gipa Utilisation Certificate (UC)-ko ua on·ahachim.
Iani bidingo inquiry dol, sandirokaniko dakon, estimate ba DPR-koba man·jahachim aro file-o Sadar Traffic Branch-ko taridapna chamgipa gong lak 3-ni hisapkosan man·aiahachim.
