SHILLONG: Da·o dipet Meghalaya a·doko Bharatiya Janata Party (BJP), inditana manderangko salna man·kujaengoba re·baenggipa 2023 bilsini Assembly election-o komibeoba dam 35 seat-rangko chegen ine Meghalaya BJP-ni state president Ernest Mawrie parakataha.
Shillong songjinmani Jail Road-o BJP-ni office-ko nokdongggae on·angani ja·man kobor ra·timgipa manderang baksa agangrikengon, a·dokni sakgittam MLA-rangde December jani skanggipa antio BJP-o napna tik ka·manaha aro gipin sakgni MLA-rangba BJP-o napna gita agangrikengkua ine Mawrie parakataha.
Mawrie-ni parakatani gitade, BJP-o napna sienggipa MLA-rangara Trinamool Congress (TMC) aro gipin dolrangoni ong·achim.
South Tura constituency-o jakgitel watako man·gipa Tura-ni BJP MDC Bernard Marak susagenma ine sing·on, da·o dipet South Tura seat-na ua saksasan tikitko man·na sienggipa ong·a aro ua South Tura constituency-oni susana tarisamsoengaha ine BJP-ni state president parakataha.
North Shillong aro West Shillong gita dakgipa constituency-rango baditaba sak candidate-rang susana sikenggipani gimin janapatengon, Assembly election-ni bidingo jinmana parakatahaon, uamang dorgastorangna okamatgen aro constituency mandal-rangoni district-rangona watatahaon candidate-rangni bimingko state election committee-ona watatskagnok ine Mawrie parakataha.
“Chingni survey ka·ani gita, je candidate-rangan cheani cholrang dongengachim, uandakgipa candidate-rangnasa party tikitrangko on·gen ine chinga ka·dongenga,” ine Mawrie aganaha.
Indake ong·engon, GHADC-ni gitcham chief executive membor (CEM) aro NPP-ni dilgipa Dipul Marak baksana GHADC-ni gitcham EM Sukharam Sangma sakgnian NPP-oni ong·kate BJP-o napangskaaha.
Uamang sakgnian re·baenggipa 2023 bilsini Assembly election-o BJP doloni susana gita NPP-ko watangaha ine kobor on·timgiparang parakataha.
