SHILLONG: ‘Look South Policy vis-à-vis Meghalaya’ ine pangchakaniko done salgnina Shillong songjinmani Synod College-o ong·atenggipa International Inter-Disciplinary Seminar-ko Sombar salo, a·dokni Chief Minister Conrad K Sangma a·bachengate on·angaha.
Ia salgnina ong·atenggipa International Seminar-ko a·bachengatanio a·dokni Chief Minister, jinmana aganprakangengon, Meghalaya a·dokna aro a·song gimiknan South Look policy-ni gamchatgipa ong·ani bidingo aganangenba, Act East policy-ko namao chu·sokatna nanggenchimode ian Act East Generic policy ong·na man·jawa ine parakangaha.
“Salgro salaram jolna miksonge tarigipa Act East policy-o pangchake ian salgro salaram jolni gisepon ong·na nanga,” ine Sangma aganaha.
Salgro salaram-ni a·dok ge·antion nangchakegipa niamrang donga ineba Chief Minister parakataha.
A·dokrangni gisepo abisa ma·drang gita bakrimani dongna nanga ineba ua aganaha.
“An·ching gipin a·dokrangoniko bang·en skie ra·grikna gita man·a aro an·ching an·tangtangni daka rikani aro cholrangko sualgrikgenchimosa a·songni chu·gimik bimangba bilakgipa ong·gen,” ine Chief Minister aganaha.
Salgro salaram jolo President Retreat-ko donna nangengani gimin janapangengon, salgro salaram jolo Presidential Retreat-ko dongenchimode a·songo bakrimna gita cholrangko on·gen ine Chief Minister parakataha.
Bangladesh a·song gita salgro salaram joloni West Bengal a·dokona kilometre 80-mangni gitasan chel·grikaiachim ine janapatengon, Bangladesh a·song gita re·a doani cholrang donggenchimode ian jol damgnini gisepo re·a doaniko altubatatgnokchim ine Sangma aganaha.
