SHILLONG: West Jaintia Hills a·jani Mukroh songo a·sel ong·gipani bidingo Meghalaya Cabinet, Mongolbar attamo tom·e chanchirimangenba, ia a·selni bidingo National Investigation Agency (NIA) ba Central Bureau of Investigation (CBI)-chi sandirokchina dabina gita Bristibar salo, Delhi-ona re·ange Union Home Minister Amit Shah-ko grongena tik ka·e donangaha.
Ia a·selni bidingo Cabinet-ni gita tom·e chanchirimangengon, a·sel ong·anio sianggipa manderangko mande ra·pilskaani chin gita aro duko ga·akenggipa nokdangrangna bakrimaniko on·na gita pilak sorkari official program-rangko November 30 tarikona kingking dontongatchengna gitaba tik ka·e donangaha.
A·sel ong·anio so·otako man·gipa aro saknaa man·gipa nokdangrangna kalimpaaniko mesokna gita Meghalaya a·dokni pilak biaprango ong·atna tik ka·gimin festival ba manianirangko dontongatna gitaba ia tom·anio Cabinet tik ka·angaha.
Ia a·selni bidingo National Human Rights Commission (NHRC)-ko gronge a·dok sorkarini report-ko on·na manchiangengon, ia a·selni bidingo FIR-ko ka·ahani gimin ia a·selko sandirokna gita a·doko Special Investigation Team (SIT)-ko songna aro ia dolko Eastern Range-ni DIG-ko dilatna gitaba Cabinet tik ka·e donangaha.
Ia a·selni bidingo pilakni gitan sandirokaniko dakna gita Commissions of Enquiry Act 1952-ni ning·o dingtangmancha Judicial Commission-ko songe on·naba Cabinet tik ka·e donangaha.
Budbar salo, Meghalaya a·dokni Deputy Chief Minister Prestone Tynsong baksa adita sak Cabinet Minister-rang, a·sel ong·gipa biapona re·ange, duko ga·akenggipa nokdangrangko grongna aro ia nokdangrangna sorkarini ku·rachakgimin tangka paisarangko on·na gitaba Cabinet tik ka·e donangaha.
Indake ong·engon, ia a·selni bidingo Meghalaya a·dokni Chief Minister Conrad Sangma, toromko dilgiparang aro dingtang dingtang dolni dilgiparangko gronge agangrikani ja·man, Assam a·dokni Chief Minister Himanta Biswa Sarma baksa ku·siliting gita agangrikataha aro Assam sorkarini gitaba ta·raken ja·kuko de·china didiataha ine u·iataha.
Sangma-ni patakatani gitade, ia a·sel ong·anio jak donggipa Zirikinding police station-ni officer-in-charge aro Forest Range Protection Officer-koba kamoni dontongataha aro Assam a·dokni ning·o donggipa West Karbi Anglong a·jani SP-koba gipin biapona kam ra·jitataha ine Assam-ni Chief Minister u·iataha.
