TURA: Mongolbar pringo, West Jaintia Hills a·jani Mukroh songo, Assam police aro forest guard-rangni goanichi Meghalaya a·dokni sakbonga manderangko man·chape gimik sakdok manderang siangna gita nangahani gimin Garo Hills-ni dingtang dingtang dolrangba ia a·sel ong·aniko raken jegalataha.
Ia a·selni bidingo Republican Party of India (RPI) Athawale Garo Hills Region-ni gitaba Mongolbar salo tanggitik tom·aniko ong·atangaha aro a·dok damgnini sima jolrango songdongenggipa manderangna kakket bichalko ra·bana gita kamko ka·na tik ka·angaha ine u·iataha.
RPI Garo Hills region-ni ku·wattimgipa Novembirth Ch Marak-ni parakatani gitade, ia a·selni bidingo uamang tom·e chanchirimangenba, sima jolrango songdongenggipa manderangni namgnina kamko ka·na aro kakket bichalko on·na manchiangaha.
Ia a·selna Conrad Sangma-chi dilenggipa MDA sorkariko matnangatengon, manderangni kosako re·gija ia sima jolrangni bidingo Assam aro Meghalaya sorkarini gisepo MoU-ko soi ka·grikjagenchimode iandakgipa a·selrangko nikna nangjawachim ine RPI-GHR-ni ku·wattimgipa parakataha.
Ia a·sel ong·anio so·otako man·gipa mande sakantini nokdangnan gong krorprakko aro saknaa man·gipa mande sakprakna gong lak 50-ko on·an baksana a·sel ong·anio duk ga·akgipa nokdangni mande sakprakna sorkari kamko on·china gitaba RPI Garo Hills region, a·dok sorkario dabiangaha.
Indake ong·engon, ia a·sel ong·aniko Federation of Khasi Jaintia & Garo People (FKJGP) Garo Hills Zone (GHZ)-ni gitaba raken jegalataha aro ia a·selni bidingo Assam police-ko jegalna aro duko ga·akenggipa nokdangrang baksa bakrimaniko mesokna gita da·al November-ni 22 tarikko ‘Black Day’ dake ra·enba, nisan gisimko songdochina gita Garo Hills-o songdongenggipa manderangkoba didiataha.
“West Jaintia Hills a·jani Mukroh songo ong·anggipa a·selko chinga raken jegalenga maina Assam police-rang pangnan sima arirango niamko pe·e iandake jolo songdongenggipa manderangni kosako sinjetaniko on·enga. Uni gimin Assam police-rangni kamko jegalna aro ia a·sel ong·anichi duko ga·akenggipa nokdangrangna bakrimaniko mesokna gita November 23 tarikko ‘andalani sal’ dake ra·enba, nisan gisimko songchina chinga mol·molatenga,” ine FKJGP Garo Hills Zone-ni president Pritam Arengh parakataha.