TURA: Dingtang dingtang department-rango bangbang ong·e dongenggipa kamrangko gapatjaengani gimin NPP-chi dilenggipa MDA sorkariko, Opposition Trinamool Congress (TMC)-ni dilgipa Mukul Sangma matnangataha.
Adita salrangna skang, West Garo Hills a·jani Phulbari jolo donggipa Rondupara songo, kobor ra·timgipa manderang baksa agangrikengon, sorkarini dingtang dingtang department-rango bangbang ong·e dongenggipa kamrangko MDA sorkarini gapatna gisiko nangjaengani gimin Sangma sing·doangaha.
“Bilsiantian Budget Session-ni somoio dingtang dingtang proposal-ko Assembly-ona ra·baronga. Budget-ni Expenditure-o Revenue aro Capital Expenditure-rang gnang. Revenue expenditure-ara sorkarini ning·o donggipa pilak department-ni dormaha, pension aro gipin korosrangko man·chapa. Budget-ko pass ka·aha ong·ode, department ge·antion nanga korosrangko ka·na tangka paisarangko dongna nangaha aro ian bangbang ong·e dongenggipa kamrangkoba man·chapa,” ine Opposition dolni dilgipa talataniko on·angenba, Budget-on ia pilakna korosrangko chamaha ong·ode maini gimin bangbang ong·e dongenggipa kamrangko gapatna man·skajaenga ine sing·doangaha.
Bilsianti department-rangna chamenggipa tangka paisarangara bachi gimaskaenga ineba Sangma sing·doataha.
“Ia kamrangna tangka paisarangko chame Budget-kon pass ka·aha ong·ode tangka paisarang dongjani gimin kamrangko gapatna man·ja ine uamang pa·sikna man·jawa. Tangkarangde dongmanaha indide bachi maidake ia tangkarangko koros ka·enga? Ia sing·anirangko MDA sorkari, a·dokni manderangna aganchakna nangchongmota,” ine Sangma parakataha.
Police department-o kam ka·giparang chu·ongjaenga ine a·dokni Home Minister Lahkmen Rymbui-ni agangipa kattarangko toe janapatengon, “Ian ge·sa nangchongmotgipa department ong·a aro ia department-o hajalni hajal kamrang bangbang ong·e dongenga. Mitam kamrangnade bilsi gittamna skangan interview-rangko aro physical test-rangko ra·ahachim indiba result-rangkode parakchipkujaenga. Ia kamrangna tangka paisarangko chamanaha ong·ode maini gimin ia kamrangko gapatna man·jaenga,” ine Opposition TMC-ni dilgipa sing·doangaha.
