NEHU Tura campus-ni administration-ko jingjengatjachina NGO-rangko didia

TURA: Garo Students Union aro dingtang dingtang dolrangni dabianirangko knachakjaengani gimin North Eastern Hill University (NEHU) Tura campus-ni administration-ko chipe jingjengatna ka·mikkenataniko on·angani ja·man, NEHU Tura campus-ni administration-ko chipjachina NEHU Tura-ni campus-in-charge Prof Sujata Gurudev, NGO-rangko mol·molataha.
NGO-rangni ka·mikkenatako man·soani ja·man Mongolbar salo, campus-in-charge-ni dilanichi NEHU Tura campus-ni official-rang, dingtangmancha tom·e chanchirimangenba, NEHU Tura campus-ni administration-ko chipjachina NGO-rangko mol·molataha.
“NEHU Tura campus-de mongsonggipa campus-ni functionary ba official kamko ka·e on·pagipasan ong·aiani gimin NGO-rangni dabianio mamingkoba dakna man·gijagipasan ong·aia ine baditaba chang NGO-rangna talataniko on·ahachim. Ia somoirango UG aro PG porikkarang baksana department-rango aro hostel-rango admission ra·ani somoiba ong·engani gimin da·o gita somoio campus-ko chipatgenchimode kam ka·giparangsan ong·aigija chatro chatrirangba neng·nikanirangko man·gen. Unbaksana Garo Hills-ni pilak college-rangan NEHU-ni ning·o chalaienggipasa ong·ani gimin hajalni hajal chatro chatrirangan NEHU-on ka·dongna gita nangtokenga,” ine NEHU Tura campus-ni campus-in-charge Prof Gurudev parakatenba, NEHU Tura campus-ni kamrangko maming champenga gri ka·angna man·na gita Garo Hills-o songdongenggipa manderangko aro mongsongbate chatro chatrirangko bakrimchina gita didiataha.
NEHU Tura campus-ko namdapatna gita changni chang Garo Students Union (GSU), Shillong-o donggipa NEHU-ni Vice Chancellor-ko gronge agangrikahaoba da·alonan uamangni dabianirangko chu·sokate on·kujaengani gimin ia dabianirangko salgittamni gisepo chu·sokate on·jagenchimode NEHU Tura campus-ni administration-ko chipate jingjengatgen ine GSU mikrakataniko on·angahachim.
NEHU Tura campus-ni pro-vice chancellor-na Tribal-rangoniko songchina, Tura campus-o A·chik aro Tribal chatro chatrirangna biaprangko on·chengchina, contractual basis kam ka·enggiparangko regularise ka·china, hostel, quarter aro uandakgipa building-rangko chu·onga gita rike on·china aro chatro chatrirangna namgni ong·nagipa gipin subject-rangkoba Tura campus-o a·bachengatchina gita GSU aro gipin dolrang dabiengachim ine nikna man·a.