CHOTIPARA: Garo Cultural Forum aro Garo students’ Union (GSU) dolgni nangrimenba skanggipa changna Assam Goalpara district-ni Chotipara songo salgnina ong·atanggipa 100 Drums Wangala Festival mijalo nambee matchotangaha.
Ia Wangala Festival-o, Meghalayani Dadangre songni dolsa wangalgipa dolko man·chape Kamrup aro Goalpara districtni dolsku, gimikchi dol 10 wangalgipa dolrang bakko ra·angaha.
Garo Cultural Forum-ni President Desal Bimik R Marak agana je Wangala Festival-ko bilsiantian Meghalaya-osan manirongaia. Indiba skanggipa changna chinga Assamo donggipa A·chikrangba Chotipara (Jajong Kadoram)-o wangala festivalko manienga. Chinga, Rabha Hasong Autonomous Council (RHAC) dakchakaniko man·aha, indiba chinga Assam A·dok Sorkarini chu·gimik dakchakaniko nangenga, jedakode nambate aro dal·bate ia festivalko manina man·gen ineba Marak aganaha.
RHAC executive councilor of Co-Operation, Dramatic theatre and Cinema Performance Frylin R. Marak agana, an·chingni A·chikrangni dakbewal aro daka-rikanirangko ripingna aro nambatatna gita ia bilsiona batanggimin somoirangoba RHAC tangka paisarangchi dakchakaha, jeni giminan chinga Wangala Dance-ni bidingo workshoprangko Music-ko Chotipara aro Muskhuli-o ong·atna gita man·aha.
Unomitingo, RHAC-ni Deputy Chairman Ramakanta Rabha, RHAC Executive Councillors Aditya Rabha, Nagarmal Swargiyary, GSU Assam state zone President Foldin R. Marak aro bang·a gipin dilgiparang wangala festivalo bakko ra·aha aro katchabeaha. Indake A·chikrangni kal·susaanirang aro cha·a ringani song·a chananirangoba susaatanirangko dakataha.
A·chikrangni daka rikanirangko ripingna gita Garo Cultural Forum-ni ia wangala festival-ko namen nambegipa ja·ku de·ani ong·a, jekon Assamo skanggipa changna ong·atenga ine RHAC-ni Deputy Chairman Ramakanta Rabha aganaha. Unomitingo, RHAC-ni ning·o donggipa pilak jat-ma·malrangni daka rikanirangkon ripingna tarienga aro pilaknan pangnan dakchakanirangko on·na gita jotton ka·enga ine Chief executive councilor Tankeswar Rabha aganaha. RHAC-ni ning·o donggipa pilaknan workshop-rangko ong·na gitaba RHAC pangna tangka-paisarangchi dakchakenga ineba ua agandapaha.
