SHILLONG: Re·anggipa November 22 tariko, Jaintia Hills a·jani Mukroh songo Assam police aro forest guard-rangni skatang goanichi songni sakbonga manderang siangna nangahani gimin a·dok sorkari, ia a·selni bidingo sandirokna gita Justice (retd) T Vaiphei-ni dilanichi judicial commission-ko songe on·angaha.
“Ia a·selni bidingo sandirokna gita chinga judicial commission-ko songna manchiangaha. Anga an·tangde Delhi-ona re·angani gimin iani bidingo u·iataniko on·manenggnok ina anga ka·donga,” ine a·dokni Deputy Chief Minister Prestone Tynsong, kobor ra·timgiparangna parakataha.
Ia a·selni bidingo sandirokani kamko inquiry commission ta·raken matchotenba sorkarina report-ko on·gen ineba ua an·tangni ka·dongchakenganiko parakataha.
Mukroh songo ong·gipa a·selni bidingo Meghalaya Police-ni gitaba mokordomako ka·aha aro DIG (Eastern Range)-chi dilenggipa Special Investigation Team (SIT), ia a·selko sandirokna a·bachengaha ineba Deputy Chief Minister parakataha.
“Mukroh songni dosgri sakbonga manderangko so·otanio jak donggipa manderangko SIT rim·gen ine chinga ka·dongenga. Ia a·sel ong·anio jak donggipa manderangko niamo pangchake rim·na chinga kamko ka·gen,” ine Tynsong aganaha.
Ia a·selni bidingo bichal ka·aniko Meghalaya a·dokon dakchina dingtang dingtang dolrangni dabienggipani gimin sing·on, ia a·sel Meghalaya a·dokon ong·ani gimin bichalkoba Meghalaya a·dokon ka·gen ine Tynsong parakataha.