AMPATI: South West Garo Hills a·jani Kalaichar-o donggipa aro Bangladesh Kurigram a·jani Baliamari simao donggipa Indo-Bangla Border Haat-ko bilsigni batpile COVID-19 sajinmani a·sel chipe donani ja·man Budbar salo, a·song damgnini official-rangni mikkango kulipiltaiaha.
Ia Border Haat-ko 2020 bilsini March jao COVID-19 sajinmani a·sel chipe donatahachim aro ia Border Haat-ko 2021 bilsini January jao kulipiltaiahaoba, gnigipa changna COVID-19 giprorotaiahani gimin chipe donattaina nangahachim.
Uandaken da·o COVID-19 sajinma namangpilahani gimin ia Border Haat-ko Budbar sal dipet kulipiltaiaha aro ia Border Haat-ko kulipilani somoio India a·songchipakni South West Garo Hills a·jani Additional Deputy Commissioner AVD Shira baksana district administration aro district police-ni official-rang dongpae bak ra·angaha.
Ia Border Haat-ko kulipiltaina gita re·anggipa November-ni 15 tariko, Indo-Bangla Joint Border Haat Management Committee, Kalaichar Border Haat-o tom·e chanchirimangaha aro ia tom·anio South West Garo Hills a·jani Deputy Commissioner Gideon Kharmawphlang aro Bangladesh a·songni ning·o donggipa Kurigram a·jani District Magistrate Md Rezaul Karim dongpae, tom·aniko dilangahachim.
Ia tom·aniko ong·atanio South West Garo Hills a·jani Superintendent of Police (SP) Steve Rynjah, Additional Deputy Commissioner-rang, Border Area Development Officer (BADO) aro gipin official-rangko man·chape Bangladesh a·songni Customs Officer, gipin official-rang aro Haat Committee-ni membor-rangba dongpae bak ra·angahachim.
Ia Border Haat-ko antio changgni dake, chong·motan Sombar aro Budbar salrango kulina tik ka·angaha aro ia Border Haat-o ming 62 bosturangko bading chiwalgrikna, palbadinggiparangko sak 50-ona bariatna, Border Haat-ko nitodapatna aro bazar cha·chakgipa biapko kadulna gitaba ia tom·anio Indo-Bangla Joint Border Haat Management Committee tik ka·e donangaha.
Ia Joint Border Haat Committee-ni tom·aniko komibeoba bilsio changprak ong·atna gitaba ia tom·anio tik ka·angaha.
