SHILLONG: Jaintia Hills a·jani Mukroh songo songdongenggipa Khasi manderangko niam gri songdongenggiparang ine Karbi Anglong Autonomous Council (KAAC)-ni chief executive membor (CEM) Tuliram Ronghang-ni agananiko Hynniewtrep A·chik National Movement (HANM) jegalatenba, uni iandakgipa kattarangko agananiara Khasi aro Karbi jatni gisepo meligrikgijaniko ra·baani gita ong·gen ine mikrakataniko on·angaha.
HANM-ni president Tyllang Thongni-ni kobor ra·timgiparangna parakatani gitade, a·dok damgnini simarango ong·enggipa a·selrangara Meghalaya aro Assam sorkarini gisepo agangrikna nangenggipa kamsa ong·a ine dingtang dingtang NGO-rang, political dilgiparang aro toromni dolrangba aganahachim aro ian darang jatni gisepo nangatena nanggipa kam ong·jachim.
“Mukroh songo songdongenggipa Khasi manderangko niam gri songdongenggiparang ine Karbi Anglong Autonomous Council (KAAC)-ni chief executive membor (CEM) Tuliram Ronghang-ni agananiara Khasi aro Karbi jatni gisepo meligrikgijaniko ra·baanisa ong·gnok,” ine Thongni aganaha.
A·dok damgnini simarango ong·enggipa golmalrangko namatpilna aro tom·tomaniko ra·bapilna man·na gita ia obostarangni bidingo politics kal·gija apsan ku·mong nangrime kamko ka·china gita HANM Ranikor circle-ni chief advisor John Sangma, dingtang dingtang political dolrangko didiatskaaha.
“Sima jolrango songdongenggipa manderangna kakket bichalko ra·bana man·na gita dingtang dingtang dolrang baksa nangrime kamko ka·china anga Meghalaya sorkariko mol·molna ska,” ine Sangma aganaha.
Ia jolrango songdongenggipa manderangna naljokaniko aro chel·chakaniko on·na man·na gita ia jolrango SWAT, SOT aro SF-10-ni sipai dolrangko donatchina gitaba HANM, a·dok sorkariko didiataha.
