SHILLONG: BJP-o napchina didianiko AITC-ni chief whip aro Umroi-ni MLA George B Lyngdoh jechakahani gimin Meghalaya BJP-ni uko rime katna jotton ka·ani chu·sokgipa ong·jaha.
NPP aro BJP dolgnian gipin MLA-rangko rime katenga ine janapatengon, “Angkoba BJP-o napchina aganahachim indiba uamang sorkariko name chalaigija election chenamangmangsan miksonganirang dongaiani gimin anga iandakgipa dolrango napna skani dongja,” ine Lyngdoh parakataha.
“Bilsibri jaskuna NPP aro BJP dolrang, politics kal·e dongenba da·o jagittamni giseposa kamrangko ka·na miksongenga indiba a·dokni manderang bilsibri jaskuni giseposa kam ka·aniko nangachim. Uni gimin anga iandakgipa dolrango napna skani dongja,” ine Lyngdoh aganaha.
Lyngdoh-ni parakatani gitade, a·dokni manderang ia sorkarini kamo suk ong·tokjaengaha maina da·o somoirang bon·angachibarasa ia sorkari, police outpost-rangko songna aro dingtang dingtang kamrangko ka·e mesokna jotton ka·engachim.
“Batanggimin somoirango ia sorkari police-rangnaba maming kamkon ka·jaha. Police-rangna dongchakani biaprang aro nangchongmotgipa bosturangba sokangjaha. Uamang pangnan ku·sikchisa kamko ka·rongaia,” ine AITC-ni chief whip parakataha.
NPP-ni MLA sakgni doltangko wate gipin dolo napangskaengani gimin janapatengon, “NPP-ni MLA sakgni doltangko watangako nike anga namen aiao inmanbea. Doltangni manderangan da·o dolni dilgiparango ka·dongna man·jaengaha. Bilsibri atana NPP-o donggipa manderang da·o party-ni kamko ma·siengaha aro haida mikkangchi bang·bata dilgiparangba uamangko watangnaba gnang,” ine Lyngdoh parakataha.
AITC-ni dilgipa sakgni, NPP-o napskana sienga ine a·kangenggipani bidingo janapatskaengon, “Saksa sakgni MLA-rang watanggenchimoba TMC-nade maming aiao inmanani dongjawa. Chinga a·bachengonin obostarangko name niengaha aro MLA ong·aiani giminde party tikitko man·gen indake ong·ja,” ine Lyngdoh aganaha.