TURA: Adita salrangna skang, South Garo Hills a·jao donggipa Krishi Vigyan Kendra (KVK)-ni gita ‘Mera Gaon Mera Gaurav’ program-ko South Garo Hills a·jani Karukol songo ong·atangaha aro ia program-ko ong·atanio Baghmara NABARD-ni DDM Khelchandra Chongtham, NRLM-ni cluster staff Jimbarth Sangma aro KVK-ni official-rangba bakko ra·angtokaha.
Ia program-ko ong·atanio South Garo Hills KVK-ni Head aro Senior Scientist Dr Athokpam Haribhushan, songni nokni manderangna agan-skie on·angengon, namnamgipa bitchilrangko gama ge·ani, gama ge·anio namgipa bosturangko jakkalani, wak bi·sa pe·aniko namdapatani, na·tokni rokomrang aro ICAR Institute baksana CAU-ni tarigipa gital kolrangni bidingo agan-talate on·angaha.
Ia program-ko ong·atanio Baghmara NABARD-ni DDM Khelchandra Chongtham-ba jinmana aganprakengon, KVK-ni gita gama ge·anirango pilak nanga dakchakanirangko on·enga ine parakatenba, KVK-ni on·enggipa bitchil aro kolrangko jakkalchina songo noko game ge·e cha·enggiparangko didiangaha.
Ia program-ko ong·atanio KVK-ni Subject Matter Specialist Dr Rike Chechak A Sangma-ba jinmana aganprakengon, South Garo Hills a·jao dingtang dingtang rokomni gama ge·anirangko dakchina agan-ku·pattianirangko on·angaha.
Ia program-ko ong·atani bak gita dingtang dingtang me·su bitchilrang, jekai kobi, beans, dorai, dhania, laisak, nakap, ka·rek, broccoli, lau aro jal·lik bitchilrangko game ge·e cha·giparangna suale on·angjolaha.
Ia program-ko ong·atanio Karukol songni wilwilao game ge·e cha·enggipa gimik sak 33 manderang skie ra·angaha.
